Претседателот на Собранието на Република Северна Македонија, Африм Гаши денеска ја прими Делегацијата од Меѓупарламентарната група за пријателство Турција – Северна Македонија, на Големото турско национално Собрание, која престојува во тридневна посета на земјава.
Како што информираат од собраниската прес-служба, на средбата на претседателот Гаши со турските пратеници било заклучено дека во последната година е интензивирана билатералната комуникација на повеќе нивоа, како уште една потврда за големото и традиционално пријателство меѓу двете држави и народи. Претседателот Гаши во оваа прилика изразил благодарност за помошта од Турција за лекување на повредените во трагедијата што се случи во март годинава во Кочани.
Тој исто така се заложил за понатамошно продлабочување на парламентарната соработка, посочувајќи на можноста за интензивирање на комуникацијата меѓу работните тела кои покриваат исти области во двата парламенти.
Претседателот на Меѓупарламентарната група за пријателство Турција – Северна Македонија, на Големото турско национално Собрание, Ахмет Килич нагласил дека во последните неколку месеци се нотира сериозно интензивирање на билатералните средби на високо ниво, што придонесува во понатамошно унапредување на односите.
Зборувајќи за економските односи, Килич истакнал дека во овој дел веќе е поставена нова цел, откако трговската размена на меѓу Северна Македонија и Турција ја надмина границата од една милијарда долари.
На средбата биле разменети и мислења за улогата на турската заедница во земјава, за турските инвестиции, како и за можностите за унапредување на соработката во уште многу други области, како образованието, здравството или турзмот.
