Бране Петрушевски, пратеник од редовите на ВМРО-ДПМНЕ, гостуваше во емисијата „Топ Тема“ на Телма ТВ каде што истакна дека преку програми и преку министерствата ќе има системска поддршка за Кочани и сите потреби и помош којашто ќе биде потребна ќе биде обезбедена од државата.
„Со програмите коишто се во рамки на сите министерства, ќе имаме системска поддршка на граѓаните од Кочани не зборуваме за ад хок политичка поддршка којашто значи собирање на дневно политички поени врз туѓа несреќа, како што го прави тоа опозицијата. Се спомнува лицемерие, знаете што е лицемерие, лицемерие е да сте министер во Влада во којашто ви се случува живи луѓе да изгорат во модуларната болница во Тетово и да не покажете никаква грижа за тие семејства. Па зарем тие луѓе не заслужиле тогашна поддршка од владата и истата ваква грижа од овие, лица коишто тогаш биле на високо раководни позиции во владата да ја покажат и тогаш како што сега се обидуваат да ја прикажат. Е тоа е лицемерие, овде не зборуваме ние за лицемерие зборуваме за континуирана поддршка. Целата јавност беше сведок на брзата реакција на државата веднаш откако се случи оваа несреќа којашто морам да потенцирам е резултат на лош изграден систем изминатите години во кој систем учествувале и овие личности коишто денеска се пратеници а претходно биле министри“ кажа Петрушевски и додаде:
„Сите повредени беа згрижени во странство со што се овозможи минимизирање на човечки жртви, добија најквалитетна здравствена нега во држави во коишто има таква најсофистицирана здравствена нега, тоа државата веднаш го направи. Сега се работи преку програми на Владата, во делот на Министерството за здравство, реновирање на болницата, во делот на Фондот за здравствено осигурување, каде што ќе се згрижат тие луѓе за рехабилитација во делот на одморалиштето во Пониква коешто се реконструира, и сите оние потреби коишто овие лица ги имаат, Владата е во комуникација, ги слушаме овие луѓе и сите нивни потреби ќе бидат реализирани во согласност со постојаниот буџет и со програмите коишто ги имаме во министерствата и нема потреба од политиканството што го прават СДСМ. Нека не се грижи опозицијата, ние не сме како нив, нема да ги оставиме овие граѓани како што тие ги оставија семејствата од модуларната болница, од Ласкарци, од Беса Транс ние нема да покажеме таква бесчувствителност како што покажуваа тие изминатите 7 години и сите нивни потреби ќе бидат задоволени и секоја помош којa што ќе им биде потребна ќе биде обезбедена од државата. Кочани ќе остане врвен приоритет на оваа влада и ќе има инвестиции во таа општина“ посочи Петрушевски.
Петрушевски посочи да не се прави злоупотреби од страна на опозицијата со трагедијата од Кочани.
„Да не се злоупотребува трагедијата од Кочани за личен пи-ар. Мора да ги почитуваме тие семејства, мора да ја почитуваме тагата и несреќата на тие семејства и не сакаме тоа да биде политички пи-ар. Битно е да има комуникација со тие семејства и има, битно е да им се излегува во пресрет на потребите на тие семејства и тоа владата го прави“ заклучи Петрушевски.
