Потпретседателката на СДСМ, Кристина Костова, реагираше на социјалната мрежа Фејсбук по повод приклучувањето на Мишко Ралев кон тимот на кандидатот за градоначалник на Скопје од ВМРО-ДПМНЕ, Орце Ѓорѓиевски.
Без директно да го спомене Ралев по име, Костова испрати јасна порака за важноста на интегритетот и колективната одговорност во политиката и општеството.
„Личниот и професионален интегритет и достоинство се бесценети, но, за жал, сѐ поретки во нашето опкружување,“ напиша Костова.
Таа потенцира дека себичноста и егото не смеат да ја надвладеат општествената добробит:
„Ќе нѐ биде кога себичноста и егото нема да ја совладаат колективната благосостојба и напредок.“
Во продолжение на објавата, таа ги осуди, како што рече, „каприциозните мегаломански очекувања“ на поединци кои, според неа, ги поткопуваат основните вредности:
„Каприциозните мегаломански очекувања на индивидуата не смеат да ги прегазат професионалните и човечки принципи кои се суштински за одржување здраво општествено ткиво.“
Костова додаде и дека ваквите случувања само ја потврдуваат исправноста на партиските одлуки:
„Добро е што однапред се потврдува исправноста на нашите одлуки. Ставовите и позициите се кристализирани.“
Објавата завршува со повик за обединување на чесните и искрените луѓе во борбата против оние кои, како што вели, го разнебитуваат општеството:
„Редно е чесните, искрени и добри намери да се обединат во рационално дејствување против оние кои недвосмислено ни го разнебитуваат општеството.“
Професорот на Архитектонскиот факултет, Мишко Ралев, кој до неодамна важеше за еден од најсериозните кандидати за градоначалник на Скопје од редовите на СДСМ, откако не ја доби поддршката, одлучи да му се приклучи на тимот на кандидатот на ВМРО-ДПМНЕ, Орце Ѓорѓиевски. Информацијата ја потврди самиот Ѓорѓиевски преку објава на Фејсбук, изразувајќи благодарност и задоволство од приклучувањето на професорот Ралев.
Ј. Ѓ.
Поврзано:
