Обвинителите во вторникот го обвинија Тајлер Робинсон, кој е осомничен за убиството на контроверзниот конзервативен политички активист Чарли Кирк, за тешко убиство и најавија дека ќе бараат смртна казна.
Атентатот врз Кирк, извршен пред шест дена на настан во Универзитетот во Јута Вали, предизвика шок низ целата земја и е најнов пример за насилството кое ја потресува американската политика, пишува Си-Ен-Ен.
Обвинителството на округот Јута го обвини Робинсон преку т.н. „information document“ наместо преку обвинение од голема порота. Овој документ овозможува обвинителите директно да поднесат обвинение, но бара судско рочиште за утврдување на основано сомневање, на кое судијата ќе одлучи дали има доволно докази за да продолжи постапката.
Во документот за обвинението против 22-годишниот осомничен се наведуваат собраните докази, меѓу кои ДНК пронајдена на оружјето и испратена порака во која признава дека го сторил делото.
Мотив
Во обвинителниот документ се вели дека Робинсон „намерно“ го таргетирал Кирк поради неговото „верување или перцепција во врска со политичкото изразување на Кирк“. Не се наведуваат конкретни причини, но се вклучени изјави од неговото семејство и цимер дека Кирк „ширел премногу омраза“ и дека Робинсон „имал доволно од таа омраза“.
Тешко убиство и други обвиненија
Покрај тешко убиство, обвинителите изнеле уште шест обвиненија против Робинсон:
– две за попречување на правдата (криење на огненото оружје и облеката што ја носел),
– едно за незаконска употреба на огнено оружје,
– едно за извршување на насилен акт во присуство на дете,
– две за попречување на сведоци (барајќи од цимерот да избрише инкриминирачки пораки и да молчи пред полицијата).
Пораки и белешка до цимерот
На денот на нападот, Робинсон му испратил порака на својот цимер: „остави сè и погледни под мојата тастатура.“ Под неа имало белешка: „Имам шанса да го ликвидирам Чарли Кирк и ќе го сторам тоа.“
Цимерот одговорил: „Што?????????? Се шегуваш, нели?“
Робинсон му признал дека со недели го планирал нападот и дека сакал ова да остане тајна „до мојата смрт од старост“.
Бегството од покривот на универзитетот
Обвинителниот документ наведува дека полицијата забележала личност облечена во темна облека како се движи по покривот, легнува во „снајперска положба“ и потоа бега носејќи оружје завиткано во пешкир. Подоцна, во блиска шумска област било најдено пушката – „Маузер Модел 98“ калибар .30-06 со оптика.
ДНК докази
Форензичката анализа покажала ДНК на Робинсон на обвивката од испуканиот куршум, на самата пушка, на три неиспукани куршуми и на пешкирот.
Пораки на куршумите
На куршумите биле изгравирани пораки. Некои биле политички („Хеј, фашисте! Фаќај!“), а други биле интернет-мемиња и шеги од видео игри, како „NoTices Bulge OWO What’s This?“ и „UwU“. Робинсон на цимерот му напишал дека пораките биле „главно мемиња“.
Препознавање и предавање
Околу 33 часа по убиството, Робинсон сам се предал во полиција, заедно со своите родители и семеен пријател. Родителите го препознале на фотографиите објавени од ФБИ, а татко му сфатил дека описот на оружјето одговара на пушка што му ја подарил на синот.
Пред да се предаде, Робинсон им признал на родителите: „Премногу зло има, а тој човек (Кирк) шири премногу омраза.“
Редакција Фронтлајн
