Со претставата „Грабеж на диамантот” во режија на Ќазмедин Нуредини а во изведба на членовите на албанската драма при Центарот за култура „Трајко Прокопиев“ од Куманово, синоќа во Центарот за култура во Дебар почна 24. издание на фестивалот „Албански театар во Македонија“.
Публиката, која ја преполни концертната сала актерите ги награди со бурен аплауз.
Пред претставата се обрати директорот на фестивалот Илбер Нуредини, кој, како што рече со изборот на претстави и ова издание убеден е дека ќе ја потврди својата успешност.
– Голема благодарност до сите кои веруваа во нас и придонесоа во подготовката, организацијата и одржувањето на фестивалот. Посебна благодарност до Министерството за култура, Општина Дебар, Центарот за култура и други донатори со чија поддршка фестивалот опстојува. Фестивалот стана традиционален, дебарската публика која знае да го оцени најдоброто, очекува да се исполни долгогоишното барање истиот да се институционализира. Дебар го заслужува тоа, рече Нуредини.
Публиката и сите дебрани ги поздрави и фестивалот за отворен го прогласи вице премиерот Арбен Фетаху, кој посака пријатни мигови и во следните театарски денови.
На оваа манифестација, која редовно се одржува во Дебар, а завршува на 30 септември, пред публиката ќе се претстават театарски куќи од Скопје, Тетово, Гостивар, Тирана, Прешево и Приштина.
Вечерва ќе биде прикажана претставата „Вистината“ во режија на Бесфорт Идризи во изведба на Албанскиот театар за деца и младинци од Скопје.
Последната вечер пред дебарската публика ќе настапи Национален Театар на Косово – Приштина со „АРТ“ во режија на Башким Рамадани. Веднаш потоа предвиден е концерт „Валцери и полки од Штраус“ – Квартет предводен од Пламенка Трајковска, по што ќе бидат доделени награди за најдобра претстава, режија, актер и актерка.
Одржувањето на фестивалот е поддржано од Министерството за култура, кое годинава додели 1,5 милиони денари, што е двојно поголем износ од минатата година, Општина Дебар, со 350 илјади, како и дебарски компании.
