Шест детски и младински претстави, од кои пет гостински, ќе бидат изведени во официјалната (натпреварувачка) програма на 4. Интернационален фестивал на детски театри „Игор Маџиров”, кој ќе се одржува од 15 до 18 октомври 2025 во организација на Театарот за деца и младинци со Совет на фестивалот.
Нив ги избрала селекторката Драгана Милошевски-Попов од над 40 пристигнати апликации. На прес-конференција на ТДМ денеска беше посочено дека под мотото „Сцена за сечиј сон“, фестивалот ќе ја обедини регионалната театарска сцена со претстави што „преку игра, хумор и фантазија го допираат живиот корен на човечкото искуство“.
Во официјалната програма се претставите: „Играј со мене!” на Андреј Бока од Суботица, „Малата Фрида” на Аница Томиќ од Загреб, „Како оздраве штурецот” на Никола Завишиќ од Белград, „Прозорецот” на Давид Зуазола од Темишвар, нашата „Свадби на животни и нешта” на Георги и Раја Господинови во продукција на театарот „Сенки и облаци“ и „Сино” на „Хon Сињор” од Атина со која в сабота ќе биде затворен фестивалот.
Фестивалот ќе биде отворен задутре (15 октомври) со претставата на ТДМ „Франкенштајн” на Кокан Младеновиќ, која е надвор од натпреварувачката програма и ќе биде изведена во чест на гостинските претстави од програмата во наредните денови (16-18 октомври).
-Фестивалот повторно ќе биде град на детската имагинација. Од 40 пристигнати апликации, селекторката Милошевски-Попов направи извонреден избор, истакна на прес-конференцијата в.д. директорката на ТДМ Фросина Карловиц.
Режисерот Игор Ивковиќ, член на Советот на фестивалот, посочи дека шесте претстави избрани за официјалната селекција „се занимаваат со малку поважни, не толку розови светови што сме навикнати да ги гледаме во детско-младинската театарска продукција“.
-Претстави што зборуваат за многу суштински теми со кои се соочуваат денешните млади генерации, нивните љубовни предизвици, нивните анксиозности, нивната отуѓеност во денешното време, рече Ивковиќ.
Поради финансиска неможност, програмата е ограничена на шест претстави иако, како што соопштија организаторите, имало голем интерес и аплицирале повеќе квалитетни претстави.
Катарина Илиевска-Силјановска, член во Советот на фестивалот, кажа дека кон него пристапува многу емотивно затоа што е именуван по Игор Маџиров, како што рече, „нашиот драг и никогаш непрежален колега кој е вечно со нас“.
-Затоа овој фестивал го доживуваме како нешто особено драго, додаде Илиевска-Силјановска.
Сите претстави, освен „Франкејнштан“, ќе се натпреваруваат за Гран-при наградата за режија, две актерски награди, награда за костимографија и за сценографија. За наградите ќе одлучува жири во состав: Игор Третињак од Хрватска и нашите актерки Изабела Новотни и Јулијана Мирчевска, а седумчлено детско жири ќе ја додели наградата за најдобра претстава според младата публика.
Фестивалот ќе има и придружна програма – драмско читање и панел-дискусија „Животот на еден современ македонски драмски текст”, работилница за сценско движење под менторство на српскиот актер и режисер Дамјан Кецојевиќ, и креативната работилница „Како се прави кукла”, водена од Ирина Сомборац. Сите три работилници се наменети за млада публика, ученици и млади креативци.
Претставата „Франкенштајн“ на ТДМ пред неколку дена доби награда од публиката на 65. Интернационален театарски фестивал МЕСС во Сараево, во рамките на програмата „Мали МЕСС“, специјално креирана за тинејџерската публика.
Од ТДМ велат дека „Франкенштајн“ е современа и ритмична адаптација на романот на Мери Шели, „која ја преиспитува границата помеѓу човекот и чудовиштето, и улогата на заедницата во нејзиното поставување, моделирање и управување“.
