Голема полициска акција беше активирана утрово во Калесија во БиХ, недалеку од Тузла, по разбојништво во златарница што започна со пукање во прометен дел од градот и заврши со пронајдено безживотно тело на еден од наводните сторители.
Телото фрлено од возило во бегство
Според првичните, неофицијални информации објавени од Klix.ba, еден од осомничените за кражбата бил пронајден мртов, а се претпоставува дека неговото тело било исфрлено од возилото додека групата се обидувала да избега од местото на нападот. Недолго потоа, полицијата лоцирала и запален автомобил што, според истрагата, бил користен во разбојништвото.
Активирана широка полициска потера
Инцидентот бил пријавен околу 07:35 часот во Оперативниот центар на МВР на Тузланскиот кантон. Ангажирани биле сите расположливи полициски патроли од Полициската станица Калесија, крим техника, специјалните тимови за брза интервенција, како и единици од соседните станици Запна, Живинице и Зворник.
Поради можноста сторителите да се обидат да ја преминат ентитетската линија, во потерата се приклучиле и припадници на Граничната полиција на БиХ и МВР на Република Српска, правејќи ја оваа акција една од најголемите координирани потери во регионот во последните години.
Пукано во близина на училишта
Разбојништвото се случило во исклучително прометен дел од Калесија – непосредно до основно и средно училиште, како и голем број кафулиња и продавници. Пукањето предизвикало силна вознемиреност кај жителите, особено кај родителите и учениците кои во тој момент се движеле кон училиштата.
Полицијата целосно го блокирала поширокиот центар на градот. Увидот е во тек, а од МВР на ТК порачаа дека додека не заврши увидот, не можат да потврдат дали имало пукање и кон полициските службеници.
