НАСА потврдува: свежите ледени зрнца од подповршинскиот океан на Енцелад содржат органски соединенија невидени досега, што дополнително го засилува интересот на астробиологијата за оваа месечина на Сатурн.
Во новата анализа објавена во списанието Nature Astronomy, истражувачите ја користеа архивата од мисијата Cassini за да откријат органски молекули што претходно не биле забележани во материјалот исфрлен од океанот под мразот на Енцелад. Станува збор за честички собрани при блискиот и исклучително брз прелет на леталото на само дваесет и еден километар од површината, што им овозможило на научниците да работат со свеж, неизменет материјал директно од подповршинскиот извор.
Истражувачкиот тим забележал зголемена разновидност на органски молекули, меѓу кои и соединенија од групите на алифатични и циклични естри и етери, како и молекули со двојни врски во нивната структура. Овие нови наоди доаѓаат како надградба на веќе познатите комплексни ароматични, азотни и кислородни органски соединенија идентификувани во E прстенот на Сатурн. Но за првпат, истите се детектирани во честички собрани директно од облакот на Енцелад, а не од материјал изложен со години на космичка радијација.
Според водечкиот автор на студијата, Нозаир Каваја од Слободниот универзитет во Берлин, клучен момент е што новите молекули се пронајдени во ледени зрнца кои биле стари само неколку минути, исфрлени директно од океанот под мразот. Ова им дава на научниците попрецизен прозорец кон хемиските процеси што се одвиваат под површината на месечината. Каваја објаснува дека претходните органски молекули во прстените на Сатурн може да биле изменети од радијацијата, што не било случај со свежите честички анализирани сега.
Експертите сметаат дека ваквата комбинација од органски молекули претставува можен пат кон хемиски реакции кои можат да формираат покомплексни структури значајни за биолошките процеси. Според коавторот Франк Постберг, откритието покажува дека Енцелад поседува стабилен резервоар на органски материи што се достапни во океанот, а не се само резултат на долготрајна изложеност на вселенски услови.
Честичките биле собрани уште во 2008 година, кога леталото Cassini прелетало низ еден од гејзерите на Енцелад со брзина од околу осумнаесет километри во секунда. Ударот ги испарил и јонизирал ледните зрнца, а нивните јони биле анализирани со мас спектрометарот Cosmic Dust Analyzer. Научниците успеале да ги идентификуваат најситните можни фрагменти, дури и помали од вирус на грип, што им овозможило да откријат молекули невидени во претходните мисии.
Ова откритие претставува значаен чекор кон разбирањето на хемиската активност во океанот на Енцелад. Според астробиолозите, комбинацијата од вода, енергија и комплексни органски молекули го прави Енцелад еден од најперспективните светови во Сончевиот систем за потрага по биохемиски процеси слични на оние на Земјата.
Мисијата Cassini Huygens, која беше заеднички проект на НАСА, Европската вселенска агенција и Италијанската вселенска агенција, го истражуваше системот на Сатурн речиси две децении. Иако мисијата заврши во 2017 година, нејзината научна архива и ден денес носи нови откритија, а најновите резултати покажуваат дека Енцелад останува една од највозбудливите дестинации за идните вселенски мисии.
Извор: NASA, Nature Astronomy.
Редакција Фронтлајн
