Украинскиот претседател Володимир Зеленски допатува во Париз на разговори со францускиот претседател Емануел Макрон, во рамки на засилената дипломатска активност насочена кон можен прекин на војната во Украина, која трае речиси четири години. Посетата на Зеленски следи по состанокот меѓу украински и американски претставници во Флорида, кој американскиот државен секретар Марко Рубио го оцени како продуктивен, пишува Euronews.
Според дипломатски извори, двете страни работеле на измени на предложениот мировен план изготвен од САД, кој бил развиван во преговори меѓу Вашингтон и Москва, но наиде на жестоки критики дека премногу ги фаворизира руските барања. Најгласни критики стигнале од европските сојузници на Украина, кои, иако ги поздравуваат американските напори за мир, реагирале на клучни точки од нацрт-планот.
Францускиот претседател Емануел Макрон на социјалната мрежа X објави фотографија од средбата со украинскиот претседател Володимир Зеленски, испраќајќи порака дека дипломатските напори продолжуваат.
„Работата за мир продолжува“, напиша Макрон на француски и англиски јазик, објавувајќи фотографија со украинското и француското знаме, во контекст на разговорите во Париз.
Le travail pour la paix se poursuit.
The work for peace continues.
🇺🇦🇫🇷 pic.twitter.com/31OgcnrO2s— Emmanuel Macron (@EmmanuelMacron) December 1, 2025
Пред средбата со Зеленски, кабинетот на Макрон соопшти дека лидерите ќе разговараат за условите за „фер и траен мир“. Во меѓувреме, американскиот претседател Доналд Трамп ја релативизираше важноста на мировната рамка во 28 точки – која предвидува ограничувања на големината на украинската армија, блокада на членството на Украина во НАТО и отстапување територии – оценувајќи ја како „концепт“ што сè уште треба да се „дообликува“.
Минатата недела Макрон, еден од најсилните европски поддржувачи на Кијив, повика западните сојузници да понудат „цврсти и недвосмислени“ безбедносни гаранции за Украина во случај да се постигне прекин на огнот или мировен договор. Францускиот претседател ја поддржа и идејата за распоредување „реосигурувачка сила“ – на копно, море и во воздух – како механизам за гарантирање на безбедноста на земјата.
Во истиот контекст, портпаролот на Кремљ Дмитриј Песков потврди дека рускиот претседател Владимир Путин во вторник ќе се сретне со американскиот пратеник Стив Виткоф. Улогата на Виткоф во мировните напори беше под лупа минатата недела, по извештаи дека наводно го советувал тимот на Путин како да му го претстави мировниот план на Трамп – наводи што и Вашингтон и Москва ги релативизираа.
