Русија во текот на ноќта кон 6 декември изведе еден од најмасовните комбинирани напади врз украинската енергетска инфраструктура, погодувајќи трафостаници, производствени постројки и една од двете клучни линии што го напојуваат нуклеарниот комплекс во Запорижје.
Според украинската Воздушна сила, Русија лансирала 65 беспилотни летала од типот „Шахед“, 36 крстосувачки ракети и 17 балистички ракети. Забележани се 60 погодоци на 29 локации низ државата.
„Главни цели повторно се енергетските инфраструктури“, напиша украинскиот претседател Володимир Зеленски на Телеграм, додавајќи дека „Руската цел е да се нанесат болка и темнина на милиони Украинци, а веќе паднаа толку ниско што лансираат ракети врз мирни градови на Денот на Свети Никола“.
Погодени повеќе региони, сериозни штети на мрежата
Експлозии биле пријавени во Полтава, Луцк, Одеса, Запорижје и Бела Црква. Министерството за енергетика соопшти дека уништени или оштетени се производствени, дистрибутивни и преносни капацитети во Кијивскиот, Черниговскиот, Лвовскиот, Одескиот, Запорожкиот, Днипропетровскиот, Николаевскиот и Харкивскиот регион.
Во Черниговска област, беспилотни летала погодиле станбена зона и инфраструктурни објекти, потврди Државната служба за итни ситуации.
Шефот на оператерот „Укренерго“, Виталиј Зајченко, изјави за Kyiv Independent дека нападот бил „доста сериозен“ за украинскиот електроенергетски систем. „Погодени се трафостаници и производствени постројки на Укренерго, а една од двете линии што го снабдуваат Запорожиската нуклеарка е исклучена“, рече тој, додавајќи дека „другите нуклеарни централи моментално работат под полн капацитет поради безбедносни причини“.
Меѓународната агенција за атомска енергија (ИАЕА) потврди дека Запорижје останало без надворешно напојување половина час – по 11-пат од почетокот на руската инвазија. Линијата од 330 киловолти е повторно приклучена, но линијата од 750 киловолти останува недостапна.
Штети на термоцентрали, прекини на струја низ државата
Нападнати биле и термоцентрали на приватната енергетска компанија ДТЕК, што е шеста масовна целена офанзива врз нивните капацитети од октомври. Компанијата соопшти дека опремата е „сериозно оштетена“, но не откри кои централи се погодени од безбедносни причини.
Утрината се регистрирани прекини на струја во Одеса, Чернигов, Кијив, Харкив, Днипропетровск и Николаев. Часовни рестрикции се воведени во сите украински региони.
Повредени граѓани и пожар во повеќе градови
Најмалку осум лица се повредени во нападите, потврди украинскиот министер за внатрешни работи Игор Клименко. Тројца се повредени во Кијивска област, тројца во Днипропетровска и двајца во Лвивска.
Киевскиот гувернер Микола Калашник соопшти дека 42-годишен маж добил рани од шрапнели во Фастив – град каде што била погодена и железничката инфраструктура. Зеленски го нарече нападот врз железничката станица „воено бесмислен“.
Во Буча и Нови Петривци избувнале пожари поради погодени објекти, а во Днипропетровск пожарите зафатиле домови во Павлоград, како и инфраструктура во Криви Риг. Во Никопол е повредено 11-годишно дете.
Во западниот град Луцк, градоначалникот Игор Полишчук објави дека запалени се магацини со храна, додека во Днипро и Бела Црква гореле складишта со храна и лекови.
Полска активираше ловци за заштита на воздушниот простор
Полската воена авијација соопшти дека подигнала борбени авиони поради руските напади во западна Украина, како дел од процедурите за заштита на националниот воздушен простор.
Во некои региони степенот на штетата се уште се утврдува. Русија интензивно го таргетира Киев и неговата околина последните месеци, во период кога САД се обидуваат да посредуваат во процес за запирање на војната.
Во претходниот масовен напад врз Кијив на 13 и 14 ноември, беа убиени седум лица, а 29 беа повредени.
Редакција Фронтлајн
