Британскиот невролог д-р Ричард Рестак предупредува дека постои животен праг по кој консумирањето алкохол, вклучително и пивото, станува сериозен ризик за здравјето на мозокот. Според него, тој праг е 65-годишна возраст.
Иако пивото е една од најконсумираните алкохолни пијалаци во светот, проблемот, како што вели Рестак, не е во т.н. „пивски стомак“, туку во нешто далеку посериозно – влијанието на алкохолот врз нервниот систем. Во изјава за порталот LADbible, тој истакнува дека алкохолот е „многу слаб, но постојан невротоксин“, односно супстанција што директно им штети на нервните клетки.
Рестак објаснува дека по 65-тата година започнува поизразено намалување на бројот на неврони и на врските меѓу нив, што доведува до постепено намалување на мозочната маса. Овој процес се поврзува со пад на физичките и когнитивните способности и со зголемен ризик од развој на деменција, особено кај лица кои подолг период консумирале алкохол.
„Во идеален свет, луѓето по 65. година би почнале значително да го намалуваат внесот на алкохол, а до 70. роденден целосно би престанале со консумација“, вели Рестак. Иако здравите навики, како редовно пешачење и физичка активност, можат делумно да го ублажат природното стареење на мозокот, според него најдобрата стратегија е превенцијата – односно избегнување на факторите што дополнително ја забрзуваат штетата.
Неврологот признава дека за многумина откажувањето од алкохол во пензионерските години може да изгледа тешко, бидејќи токму тогаш луѓето чувствуваат дека конечно имаат време за одмор и опуштање. Сепак, тој нагласува дека токму во тој период организмот е најчувствителен на негативните ефекти на алкохолот.
„Силно препорачувам, ако сте на возраст од 65 години или повеќе, алкохолот целосно и трајно да се исфрли од исхраната“, порачува д-р Рестак, додавајќи дека конечната одлука, секако, останува личен избор.
Редакција Фронтлајн
