На прес-конференција на која беше најавен уште еден успех на македонската кинематографија – дебитантскиот долгометражен филм „17“, поддржан од Агенцијата за филм, кој ќе ја има својата светска премиера на претстојниот Берлински филмски фестивал – во присуство на режисерката Митиќ и продуцентот Салковски, се обрати и директорот на Агенцијата за филм, Сашко Мицевски, кој изрази став дека едно од клучните прашања за македонската кинематографија денес е односот меѓу филмот и домашната публика.
Тој истакна дека иако фестивалските успеси се исклучително важни за меѓународната промоција на македонскиот филм, загрижувачки е фактот што огромен дел од филмовите финансирани со буџетски средства не стигнуваат до гледачите во сопствената држава. „Филмовите што ги финансира Агенцијата за филм се направени со пари на даночните обврзници. А реалноста е дека околу 90 проценти од тие филмови не стигнуваат до луѓето што ги финансираат – до нашата публика“, нагласи Мицевски.
Според него, Агенцијата за филм во моментов активно работи на изнаоѓање решенија, во рамки на постојната легислатива, со кои ќе се овозможи филмовите што живеат на фестивалската сцена да добијат реален живот и пред домашната публика. Во таа насока, како што посочи, неопходно е повеќе институции да ги отворат своите врати за македонскиот филм и да се создадат соодветни простори за прикажување на европски и македонски арт-хаус филмови.
Мицевски информираше и дека во Агенцијата е започнат процес на ревидирање на критериумите за доделување средства, при што во иднина ќе се зема предвид и колку претходните филмови на одредени автори и продуценти биле реално прикажувани и гледани во Македонија. Тој потенцираше дека не е доволно филмот административно да постои преку една фестивалска проекција, туку дека мора да има вистинска комуникација со публиката.
Дополнително, најави засилена контрола на законската обврска филмовите, по завршувањето на фестивалскиот циклус, да бидат понудени за бесплатно прикажување на Македонската радио-телевизија, со цел тие да станат достапни за пошироката јавност. Доколку оваа обврска не се почитува, како што рече, ќе следуваат сериозни санкции, вклучително и можност за долгогодишна забрана за идно финансирање.
„Бројките со кои располагаме се навистина поразителни. Имаме филмови во кои државата вложила значителни средства, а кои во текот на еден месец ги гледале неколку десетици луѓе“, истакна Мицевски, додавајќи дека токму затоа Агенцијата ќе настојува податоците за гледаност да имаат реално влијание при идните конкурси.
На крајот, тој потенцираше дека интернационалната промоција останува важна цел, но дека таа мора да оди рака под рака со обврската македонскиот филм да биде видлив и дома. „Мора да ја вратиме публиката во кината и да создадеме услови македонскиот филм да живее меѓу своите гледачи. Ќе ги активираме сите можни механизми за тоа да се случи“, порача Мицевски.
