Сообраќајните камери на улиците на Техеран овозможувале увид во движењето на целите во реално време, а токму тие податоци биле дел од сложен разузнавачки систем што довел до саботниот напад во кој загина иранскиот врховен лидер и други високи функционери, пишува CNN.
Според израелски функционер, камерите биле хакирани пред неколку години, што му овозможило на Израел детално да го мапира градот, да ги следи моделите на движење и да создаде сложена слика за случувањата во иранската престолнина.
„Машина за производство на цели“
Системот, чии делови првично ги објави The Financial Times, му овозможил на Израел да изгради она што еден израелски извор го нарекол „машина за производство на цели“, управувана со вештачка интелигенција.
Тој обработувал огромни количини податоци – визуелни разузнавачки информации, податоци од доушници, пресретнати комуникации, сигнали, сателитски снимки и други извори.
Резултатот од анализата биле прецизни координати на потенцијални цели, изразени како 14-цифрени мрежни координати. Големиот обем на информации барал моќни компјутерски системи за обработка и анализа со цел да се издвојат конкретни цели.
Иако системот се потпира на вештачка интелигенција, според изворите, за неговото функционирање и понатаму е потребен тим експерти – технолози, аналитичари на податоци и инженери – кои ги потврдуваат препораките за напад.
Години на инфилтрација
Израел, според изворите, со овој систем успеал да се инфилтрира во најтесните кругови на иранската власт.
Во текот на годините со слични операции биле ликвидирани десетици ирански нуклеарни научници и функционери, бил украден нуклеарниот архив на Иран, а во Техеран бил убиен и политички лидер на Хамас.
Повторно активиран за нападот
Истиот систем бил користен и на почетокот на 12-дневната војна меѓу Израел и Иран минатата година, кога во првичните напади бил убиен висок ирански воен командант од Исламската револуционерна гарда.
Во саботата наутро, кога САД и Израел започнале масовен заеднички напад врз Иран, системот повторно бил активиран.
Главна цел бил иранскиот врховен лидер Али Хамнеи, за кого израелските власти сметале дека во текот на денот се чувствува помалку загрозен.
Одлуката за напад
Израелскиот премиер Бенјамин Нетанјаху долго време предупредуваше на опасностите од иранската нуклеарна програма и сметал дека преговорите меѓу САД и Иран нема да донесат резултат.
На 11 февруари Нетанјаху се сретнал со американскиот претседател Доналд Трамп во Белата куќа. Приватниот разговор траел речиси три часа, а официјално била објавена само една фотографија.
Според претходни информации на CNN, на средбата се разговарало не за тековните преговори со Иран, туку за сценарио доколку тие пропаднат. Нетанјаху му презентирал нови разузнавачки информации за иранските воени способности.
„Зелено светло“ од Вашингтон
Во петокот попладне, според американски воени извори, претседателот Доналд Трамп дал наредба за започнување на операцијата.
„Операцијата ‘Епска фурија’ е одобрена. Нема повлекување. Среќно“, гласела пораката, според американскиот генерал Ден Кејн.
Тој изјавил дека нападот бил изведен откако се појавила можност и бил поддржан од американската разузнавачка заедница.
Неколку часа по нападот, израелските власти станале оптимистични за исходот, иако во тој момент сè уште немало потврда дека Хамнеи е убиен.
Потврдата пристигнала рано во неделата наутро, кога иранската државна телевизија објавила дека „врховниот лидер на Иран постигнал мачеништво“.
Редакција Фронтлајн
