Иницијативата „Кој е следен?“ повика граѓаните масовно да излезат на марш на 8 Март во Скопје, посветен на борбата против насилството врз жените и институционалната неказнивост.
Во соопштението, иницијативата упати остри критики кон институциите, оценувајќи дека системот не ги штити граѓаните и дека реакциите на надлежните доаѓаат предоцна.
„Оваа полиција не е наша полиција. Оваа држава не е наша држава. Време е заедно да осмислиме поинакво општество“, се наведува во реакцијата.
Од иницијативата прашуваат каква е институционалната реакција кога, како што велат, граѓаните со години пријавуваат насилство без резултат.
„МВР поднело кривична пријава ‘по брза постапка’. Каква е таа брза постапка откако биле одземени животи? Откако жената и нејзините соседи веќе десетици пати пријавувале? Каква е таа заштита што доаѓа отпосле?“, прашуваат од иницијативата.
Во соопштението се наведува и дека граѓаните честопати се соочуваат со игнорирање на пријавите за насилство.
„Нашиот глас никогаш не се слуша. Пријавуваш во полиција, ништо не се презема. Доаѓаме до крајности и се крева револт… и пак ништо. Сериски убијци и тепачи на деца и жени си шетаат како шерифи и никој ништо не им може“, стои во реакцијата.
Иницијативата повика на граѓанска солидарност и на заедничко дејствување против насилството и, како што наведуваат, системската неправда.
„Доста трпиме, да му ставиме крај на малтретирањето и убивањето на народот, а особено на жените. Да излеземе сите заедно на маршот за 8 Март, рамо до рамо со нашите сестри, мајки, ќерки, девојки и другарки“, порачаа од „Кој е следен?“.
Маршот е најавен за 8 март во 12 часот, а собирното место е во паркот „Жена борец“ во Скопје.
