Владата ќе организира меѓународна конференција насловена „Институционални и клинички аспекти и решенија по пожарот во Кочани – една година потоа“, која ќе се одржи на 14 март, најави портпаролката на Владата, Марија Митева.
Според неа, конференцијата ќе обедини претставници на институциите, здравствени експерти, меѓународни организации и хуманитарни партнери со цел да се направи сеопфатна анализа на одговорот на трагедијата.
„Целта не е само сеќавање. Целта е да покажеме одговорност и создавање систем кој ќе биде уште посилен, поорганизиран и подготвен да одговори на кризни ситуации“, изјави Митева.
На конференцијата се очекува учество на 37 лекари и медицински експерти од странство, кои директно учествувале во лекувањето на пациентите по трагедијата во Кочани.
Според Владата, станува збор за доктори од клиники и здравствени центри од повеќе европски земји кои ги примиле повредените пациенти во најтешките денови по несреќата.
„Нивното присуство претставува можност искуствата од заедничката работа да се претворат во знаење, протоколи и системски решенија кои ќе придонесат за подобра подготвеност на здравствените системи“, истакна Митева.
Конференцијата ќе опфати повеќе тематски панели посветени на различни аспекти од кризата, меѓу кои европскиот механизам за цивилна заштита и меѓународниот одговор, координацијата меѓу институциите и здравствените системи, како и акутниот медицински третман на изгореници.
Ќе се дискутира и за долгорочниот процес на рехабилитација на пациентите, вклучувајќи физикална медицина, психолошка и психијатриска поддршка, како и подобрување на квалитетот на живот на преживеаните.
Настанот ќе започне со свечено институционално отворање, по што ќе следува комеморативен момент во знак на сеќавање на жртвите од трагедијата.
Митева нагласи дека Владата останува посветена на долгорочна поддршка за повредените и нивните семејства, како и на унапредување на здравствените и кризно-менаџерските механизми.
„Една година по трагедијата, Владата останува доследна на ветувањето дека поддршката за жртвите, повредените и нивните семејства нема да биде еднократна, туку континуирана и системска“, изјави Митева.
