По повод одбележувањето на годишнината од трагичниот настан во Кочани, Здружението на граѓани „Ресурсен центар на родители на деца со посебни потреби“ – Скопје, во соработка со Општина Кочани, Здружението „16 март – Кочани“ и Организацискиот одбор за одбележување на годишнината од трагедијата, упатија апел до медиумите и медиумските работници да известуваат со високо ниво на професионалност и без сензационализам.
Во соопштението се наведува дека трагичните настани бараат посебна етичка одговорност, а известувањето треба да биде насочено кон заштита на достоинството на жртвите и нивните семејства, како и кон избегнување дополнителни трауми за заедницата.
Повик за медиумска солидарност со заедницата
Организаторите ги повикуваат медиумите да известуваат внимателно и со почит кон сите што ја носат болката од трагедијата што се случи пред една година.
„Токму поради тоа што трагичните настани бараат посебен степен на професионалност и етичка одговорност, известувањата од настаните во Кочани треба да бидат во насока на заштита на достоинството на жртвите и нивните семејства и без дополнителни трауми на заедницата“, се наведува во апелот.
Активностите се одвиваат под заедничкото мото „Заедно во болката, силни во поддршката“, со цел медиумите да ја покажат својата улога како важен општествен сојузник во процесот на колективно заздравување и поддршка на заедницата.
Поддршка од УНДП за психолошка помош на семејствата
Организаторите нагласуваат дека целта е медиумскиот пристап кон ваквите трагични настани да се трансформира – наместо сензационализам, известувањето да биде базирано на почит, солидарност и поддршка.
Активностите се реализираат со поддршка на УНДП, како дел од проектот „Психолошка поддршка на семејства погодени од трагедијата во Општина Кочани“, кој го спроведува Здружението на граѓани „Ресурсен центар на родители на деца со посебни потреби“ – Скопје.
