„Станувате соучесници во секој следен напад, во секоја следна жртва“ – ова е пораката што претседателката на ЛДП, Моника Зајкова, ја упати до пратениците од парламентарното мнозинство, откако по втор пат беше одбиен предлогот за воведување електронски нараквици за следење на насилниците.
Во објава на социјалните мрежи, таа остро реагира дека наместо превенција, мнозинството избрало „соучесништво во насилството“.
Според неа, одбивањето на оваа мерка претставува директно откажување од системска заштита на жртвите на насилство.
„Без збор. Без аргумент. Без срам“, наведува претседателката на ЛДП, потенцирајќи дека електронските нараквици не се казнена, туку превентивна мерка која може да спаси животи и да спречи идни напади.
Во својата реакција, Зајкова оди чекор подалеку, обвинувајќи дека одлуката на пратениците ги прави директно одговорни за идни случаи на насилство.
„Од денес станувате соучесници во секоја следна жртва, во системот кој овозможува макар и една жена да живее во страв“, стои во објавата.
Реакцијата на Моника Зајкова следи откако денеска пратеничкото мнозинство повторно не даде поддршка за воведување електронски нараквици за сторители на семејно насилство, предлог поднесен од Зајкова. Со само 27 гласа „за“ од вкупно 97 регистрирани пратеници, мерката не беше усвоена, оставајќи го отворено прашањето за конкретните механизми за превенција и заштита на жртвите.
Одбивањето на предлогот повторно ја отвора дебатата за тоа дали институциите преземаат доволно мерки за спречување на насилството, особено врз жените, и дали постојниот систем нуди ефективна заштита.
Прашањето за електронските нараквици како алатка за контрола и превенција останува отворено, додека јавноста и политичките актери сè почесто бараат конкретни решенија наместо декларативна поддршка.
Ј. Ѓ.
