Само неколку часа нè делат од лансирањето на мисијата Artemis II – првиот лет со екипаж кон Месечината по повеќе од половина век.
Ракетата SLS и капсулата Orion се веќе подготвени на лансирната рампа, додека NASA ги врши последните проверки пред финалното одбројување. Горивото е наполнето, системите се тестирани, а вниманието на светот е насочено кон моментот на полетување.
Според официјалниот план на NASA, моментот на историското палење на моторите на SLS ракетата е закажан за 1 април во 18:24 часот по локално време во САД (EDT).
За македонската јавност и сите оние кои планираат во живо да го следат овој спектакуларен настан, тоа значи дека главниот момент ќе се случи во текот на ноќта. Пресметано по македонско време (CEST), лансирањето на мисијата Artemis II е планирано за:00:24 часот (по полноќ), во четврток наутро, на 2 април.
Важно е да се напомене дека NASA има дефинирано т.н. „прозорец за лансирање“ во траење од два часа. Ова е безбедносен временски период кој им овозможува на инженерите да го одложат полетувањето за неколку минути или часови доколку се појават ситни технички пречки или привремени неповолни временски услови. Тоа значи дека ракетата може да полета во кој било момент помеѓу 00:24 и 02:24 часот по наше време.
Оваа мисија нема да вклучува слетување на Месечината, но ќе ја одбележи првата човечка обиколка околу неа по ерата на Apollo. За време на летот, екипажот ќе тестира клучни системи и ќе ја потврди безбедноста на капсулата Orion за идните мисии.
Лансирањето на Artemis II претставува важен чекор кон враќањето на луѓето на Месечината и подготовка за уште поамбициозни цели, вклучително и мисии кон Марс.
Во живо следете го полетувањето во видеото подолу.
Прочитајте и…
Одбројувањето започна: Сè што знаеме за Артемис II – мисијата на НАСА до месечината
