Општина Тетово бара од Владата построги мерки и ограничувања за заштитата на граѓаните од Ковид-19. Најпрво општинскиот штаб бара од Владата целосен прекин на организираниот патнички превоз меѓу општините во полошкиот регион, што главно го вршат приватни превозници со автобуси и комбиња.
„Мерката за ограничување и прекин на организираниот превоз на граѓани треба да се направи според примерот на општина Куманово. Ова ќе придонесе за минимизирање и спречување на акумулацијата на граѓани во поголеми групи кои кружат од една до друга општина, а со тоа ќе се минимизира ризикот од нови случаи на КОВИД-19 во овие општини” побара Теута Арифи, градоначалничка на Тетово.
Од Владата на Република Северна Македонија се бара модел за финансиска помош на вработените во ЈКП Тетово и Територијалната противпожарна единица, како и претставници од Јавното претпријатие „Македонски шуми“ да излезат на терен за да се избегнат пожари на Шар Планина.
„Имајќи го предвид фактот дека противпожарните екипи од Тетово немаат пристап до овие планински терени за да реагираат навремено во време на пандемијата, кога воедно се ангажирани со дезинфекција на патиштата и јавните површини, двете институции работат со зголемен интензитет на терен и институционалните приходи за покривање на платите се значително намалени”, рече Арифи.
Според последните информации, како што информираше Кризниот штаб, во тетовско има шест новозаболени од Ковид-19, со што вкупната бројката достигна 49. Од вкупната бројка 20 се граѓаните на општина Тетово, останатите случаи се од другите населени места. Во општина Тетово вкупно се направени 400 тестови на граѓани кои ги исполниле условите за тестирање според епидемиолошката анкета од Министерството за здравство. Кризниот штаб до Владата и Министерството за здравство, доставил барање на сите матични лекари на територијата на општина Тетово да им се обезбедат доволни количини на ракавици, маски и средства за дезинфекција.
Во насока на превенција од коронавирусот и денес немаше пазарен ден во Тетово, при што беа затворени за работа сите отворени и затворени пазари на територијата на општината.
А. Зеќири
