Министерот за правда, Игор Филков, излезе со остра реакција по повод протестите на кои се бара можност за полагање на правосудниот испит на албански јазик. Според него, овие случувања претставуваат обид полагањето на испитот да се претвори во поле за политички притисок и етничка конфронтација.
Во својата писмена реакција, Филков децидно наведува дека правосудниот испит е прашање на стручност, професионалност и почитување на правниот поредок, а не на политика. Тој ги оцени обидите да се прикаже законската обврска за познавање на македонскиот јазик како дискриминација како „опасна манипулација со јавноста и директен удар врз уставниот поредок“.
„Македонскиот јазик е службен јазик на целата територија на Република Северна Македонија и темел на институционалниот и правниот систем“, потенцира министерот, додавајќи дека е недозволиво чувствителни прашања што го засегаат правниот систем да се користат за собирање дневно-политички поени или за создавање меѓуетнички тензии.
Осврнувајќи се на самите случувања на улиците, министерот укажува дека правото на протест е демократско, но нагласува дека никој нема право „преку насилни протести да бара уривање на критериумите и стандардите во правосудството“. Испитот, како што вели тој, се спроведува исклучиво според важечките закони, а не под притисоци од улица.
На крајот од соопштението, Филков порачува дека Министерството за правда останува отворено за аргументиран институционален дијалог. Сепак, тој е категоричен дека нема да се дозволи девалвација на правосудниот систем ниту поткопување на улогата на македонскиот јазик како столб на државноста.
„Македонскиот јазик не е пречка — тој е обврска, уставна вредност и гаранција за функционирање на државата“, заклучува министерот за правда.
