Опозицискиот Социјалдемократски сојуз на Македонија (СДСМ) со обвинувања до премиерот Христијан Мицкоски и министерот за правда Игор Филков, тврди дека власта свесно ја завлекува и опструира постапката за екстрадиција на поранешниот премиер Никола Груевски од Унгарија.
Портпаролката на СДСМ, Богданка Кузеска, на прес-конференција истакна дека се распаѓа уште една лага на Мицкоски пред јавноста, посочувајќи дека партијата со месеци предупредувала оти Груевски поседува државјанства и пасоши од други земји, вклучително и унгарски, што премиерот го знаел цело време.
Според Кузеска, најавите од Министерството за правда за подготовка на документите за екстрадиција, кои траат повеќе од еден месец, се само „лажни изјави за создавање привид дека нешто се работи“, додека во реалноста документацијата воопшто не е испратена.
„Страв од менторот и зачувување на министерската фотелја“
Опозицијата смета дека мотивите за ваквото постапување се целосно политички и партиски поврзани.
„Вистината е многу едноставна – Мицкоски и Филков не сакаат Груевски да биде екстрадиран, затоа го штитат. Мицкоски не го сака враќањето на Груевски затоа што тоа директно би ја загрозило неговата позиција во партијата. Ги тргна сите потпретседатели од партијата, а од општинските комитети направи личен фан-клаб, поради страв од враќањето на неговиот ментор. Филков, пак, по секоја цена сака да ја зачува фотелјата“, изјави портпаролката на СДСМ.
Таа додаде дека доколку постоела реална политичка волја, барањето веднаш ќе било процесирано, особено по најавите на новиот унгарски премиер, Петер Маџар, пред еден месец дека Унгарија повеќе нема да биде заштитник на криминалци.
Барање за итна екстрадиција и активирање на дипломатските канали
СДСМ побара од надлежните институции итно да ги комплетираат и испратат документите со кои официјално ќе се побара испорачување на Груевски во државата.
Партијата апелираше Македонија да ги активира сите расположливи дипломатски канали, да побара меѓународна правна помош и да ги искористи сите правни механизми за поранешниот премиер да биде изнесен пред лицето на правдата во земјава.
Никола Груевски добил Унгарско државјанство во 2022 година
Унгарија останува сигурно засолниште за поранешниот македонски премиер Никола Груевски. Повикувајќи се на извор во унгарската влада, истражувачкиот портал (ВиСквер) VSquare, пишува дека Груевски, кој живее во Будимпешта од 2018 година, добил целосно унгарско државјанство во 2022 година, врз основа на „државен интерес на Унгарија“. Според друг владин извор, се верува дека тој и натаму престојува во земјата. Тоа ја прави неговата екстрадиција назад во С. Македонија речиси невозможна.
Според објавата, Груевски најверојатно сè уште се наоѓа во Унгарија, а неговиот статус е значително посигурен од статусот на други политички азиланти кои добиле заштита од претходната власт на Виктор Орбан.
Министерство за правда: Постапката за екстрадиција на Груевски продолжува
Независно од сите шпекулации и неофицијални информации за евентуалниот статус што го има во Унгарија, Никола Груевски останува државјанин на Република Северна Македонија и е лице кое е предмет на правосилни судски одлуки и активни постапки – се вели во соопштението од Министерството за правда.
Министерството за правда нагласува дека постапката за негова екстрадиција продолжува согласно домашното законодавство, билатералните договори и меѓународните конвенции. Во рамки на своите надлежности, Министерството и понатаму ќе ги презема сите неопходни правни и дипломатски чекори во комуникација со надлежните органи на Унгарија
Груевски избега од Северна Македонија во ноември 2018 година, непосредно пред да започне со издржување затворска казна од две години во случајот „Тенк“ – пресуда за корупција поврзана со набавка на оклопен луксузен „мерцедес“ во вредност од 600.000 евра.
Тој ја напушти земјата преку Албанија, а потоа продолжи низ Црна Гора и Србија, наводно со помош на унгарско дипломатско возило и, според тогашни извештаи, со вмешаност на унгарската странска разузнавачка служба. Владата на Орбан потоа му одобри политички азил.
Во Македонија во изминатиот период, по падот на Виктор Орбан од власт во Унгарија, се актуелизираше приказната за враќањето на Груевски. Во април годинава, премиерот Христијан Мицкоски изјави дека не очекува Груевски да се врати во земјата, но доколку тоа се случи „ќе оди во затвор“.
Редакција Фронтлајн
