Претседателот на СДСМ, Венко Филипче, денеска присуствуваше на изборниот конгрес на Новата социјалдемократска партија (НСДП), на покана на нејзиниот претседател Горан Мисовски. Филипче упати честитки за досегашната работа и изрази благодарност за долгогодишната коалициска поддршка, потенцирајќи дека двете партии споделуваат еднакви вредносни политики.
Тој најави дека соработката продолжува во нова форма, преку коалицијата наречена „Фронт за слобода и правда“. Од таму, Филипче упати широк повик за обединување до повеќе општествени и политички чинители.
„Во Фронтот ги повикуваме и сите други политички партии, не само овие коишто веќе го потврдија учеството, а се дел од сегашната коалиција, туку и другите политички партии, дури дел од коалициските партнери на сегашната криминална власт, затоа што тие знаат дека оваа власт не ја води државата како што треба“, изјави лидерот на опозицијата.
Покрај политичките субјекти, Филипче упати повик за приклучување и до граѓанските организации, активистите, интелектуалците, младите, студентите, како и до пензионерите за кои истакна дека веќе сфатиле оти се излажени од актуелната власт и дека немаат достоинствен живот.
Претседателот на СДСМ од говорницата упати сериозни обвинувања до владината коалиција, тврдејќи дека таа го „пљачка и последниот денар од буџетот“ за лично богатење, додека државата намерно ја држи во меѓународна изолација.
„Се бориме против оваа криминална власт којашто земјата ја држи во изолација, а тие сите имаат бугарски пасоши во џебовите, и против оваа криминална власт којашто работи за туѓи интереси — пред сè српски и руски интереси, сакајќи да останеме изолирани и слепо црево на Балканот. Тоа нема да им помине“, порача Филипче.
На крајот од своето обраќање, тој изрази уверување дека Македонија повторно ќе се врати на правиот пат кон Европа, ќе биде демократска и слободна земја во која младите генерации ќе ја гледаат својата иднина.
