Сирискиот суд во вторникот го осуди соборениот сириски претседател Башар ал-Асад, заедно со неговиот помал брат, на смртна казна во отсуство. Тие се осудени за злосторства против човештвото и воени злосторства сторени за време на 14-годишниот конфликт во Сирија, кој зад себе остави околу половина милион загинати, пренесува Асошиејтед прес. .
Казните изречени од Четвртиот кривичен суд во Дамаск се првите пресуди против Асад или членовите на неговиот тесен круг, откако пред 20 месеци заврши петдецениското владеење на семејството Асад.
„Башар Асад ги користеше државните агенции за да изврши воени злосторства и злосторства против човештвото“, изјави судијата Фахаредин ал-Аријан за време на судската седница која се емитуваше во живо на државната телевизија.
Наџиб во затворски кафез пред судот
На смрт е осуден и Атеф Наџиб, братучед на Асад по мајчина линија, кој беше прогласен за виновен за надгледување на репресијата во јужната провинција Дара, што всушност доведе до востанието, а подоцна и до граѓанската војна.
Под силно обезбедување, Наџиб стоеше во кафез во судницата облечен во затворска униформа додека судијата ја читаше пресудата. Пред зградата на судот во центарот на Дамаск се собра голема толпа луѓе за да го слушне изрекувањето на казната. За разлика од него, Башар и неговиот брат Махер избегаа во Русија по падот на владата во декември 2024 година, каде што добија политички азил. Новите владетели на Сирија веќе побараа од Русија да ги предаде.
Улогата на Наџиб и Махер Асад во режимот
Атеф Наџиб, кој во април 2011 година беше санкциониран од американското Министерство за финансии, е еден од највисоките функционери кои се изведени пред суд. Тој е поранешен бригаден генерал на сириската војска кој во 2011 година беше шеф на Филијалата за политичка безбедност во провинцијата Дара. За време на неговиот мандат, повеќе од десет тинејџери кои напишаа антивладини графити на училиштен ѕид беа уапсени и мачени. Овој случај стана катализатор за масовните протести против репресивните политики на безбедносните сили на Асад. Владата одговори со брутална репресија врз протестите, што прерасна во 14-годишна граѓанска војна која заврши со соборување на Асад преку молскавична бунтовничка офанзива.
Од друга страна, Махер Асад беше поранешен командант на 4-тата оклопна дивизија на сириската војска. Сириските опозициски активисти долги години ја обвинуваа оваа дивизија за убиства, тортура, изнуда и трговија со дрога, покрај тоа што управуваше со сопствени центри за притвор.
Ј. Ѓ.
