Во ексклузивното интервју за ЦИВИЛ МЕДИА, отец Сергиј Бережној ја опишува Православната црква на Украина како штит од руските „духовни ракети“ и тврди дека Кремљ и Руската православна црква систематски ги користат верските чувства, културниот идентитет и историските наративи за да ги приближат Украинците не до Христос, туку до империјалниот проект на Москва.
Неговото сведоштво станува особено силно кога се присетува на својата служба како воен капелан по ослободувањето на Буча. Соочен со телата на цивилите и убиените деца, вели дека и самиот посакал да земе оружје, но еден украински командант му рекол дека неговата улога како свештеник е токму да им помогне на војниците да го зачуваат својот морал и да не станат како оние против кои се борат.
Во разговорот се отвораат и прашањата за верската слобода под руска окупација, улогата на свештенството поврзано со Москва, односите меѓу Православната црква на Украина и Македонската православна црква, како и местото на Украина во Европа.
Неговиот апел до Македонската православна црква е едноставен и директен:
„Бидете добар Самарјанин за нас.“
Во продолжение, го пренесуваме делот од интервјуто во кое отец Бережној се обраќа директно до Македонската православна црква.
За мене, како украински свештеник на Православната црква на Украина, најважно е секогаш да го следиме Христос. Христос вели во Евангелието дека сите треба да бидат едно. Христос нè повикува на единство.
Затоа, ако сакаме да го следиме Христос, мораме да се обидеме да го најдеме она што нè обединува, а не она што нè разделува.
Во таа смисла, кога ме прашувате како би можеле да се развиваат односите меѓу нашите две цркви, мислам дека најнапред треба да разбереме што очекуваме едни од други во време на оваа руска агресија.
Мојот одговор е многу краток.
Ја молам Православната црква во Северна Македонија: ве молам, бидете добар Самарјанин за нас.
Ова е многу важно.
Мислам дека примерот на Добриот Самарјанин содржи сè што ни е потребно за идниот однос меѓу нашите цркви.
Бидете добриот Самарјанин за нас.
Ние страдаме. Не се соочуваме само со руска агресија; се соочуваме со нешто што јас го сметам за геноцид. Секој ден умираат нашите деца, нашите жени и нашите луѓе. Се уништуваат нашите православни цркви во Украина, како и нашата историја и сè што нè потсетува на љубовта, слободата и можноста да живееме во мир, а не во војна.
Ве молам, бидете со нас.
Преку примерот на Добриот Самарјанин можеме да изградиме и да развиваме добри односи, бидејќи го исповедаме истиот Господ Исус Христос. Ја исповедаме истата Христова љубов, која е иста и за вас и за нас.
Затоа, бидете добар Самарјанин за нас.
Во контекст на пораката на отец Бережној, оваа порака има големо значење.
Повикот до Македонската православна црква е да не ја одмине Украина во нејзината неволја, туку да покаже солидарност, сочувство и конкретна поддршка – токму како Самарјанинот што застанал покрај човекот што другите го одминале.
