Во Словенија денеска децата се вратија во градинките, а дел од учениците почнаа со настава, јави дописникот на МИА од Љубљана.
Градинките, во кои важат строги правила со цел спречување на ширењето на корона вирусот, од утрово ги отворија вратите за децата, кои повеќе од два месеца беа дома.
Повторно работат и училиштата, но само за учениците од прво, второ, трето и девето одделение. Според словенечкото Министерството на образование, утрово во училиште дошле вкупно 64.497 ученици, односно 34,5 отсто од вкупниот број основци во земјата.
Од денес отворени се и установите за престој и образование на деца со посебни потреби.
Инаку, според одлуката на Националниот институт за јавно здравје, наставниците и предавачите ќе мораат да носат заштитни маски, а просториите треба комплетно да се дезинфицираат неколкупати во текот на денот.
После точно два месеци во Словенија од утрово се отворени и внатрешните делови на рестораните и кафулињата.
Викендот што измина сопствениците на угостителските објекти го искористија за адаптација на овие простори за да можат од денес да работат почитувајќи ги сите препораки за заштита од корона вирусот.
И покрај тоа што земјата прогласи крај на епидемијата, сите гости при при влегувањето во затворениот дел од рестораните и кафулињата задолжително ќе мораат да носат заштитни маски, сѐ до оној момент кога ќе седнат на масите, кои ќе бидат меѓусебно раздалечени два метри. Персоналот ќе мора цело време да носи маска, а објектот редовно ќе се чисти.
Со ваквата одлука се задоволни во словенечката Комора на угостители, бидејќи се жалеа дека работата само на надворешните делови од објектите не е доволна за тие да бидат рентабилни./МИА/
