пишува: РИБАРО
– Лозарите од кавадаречко го блокираат патот Прилеп – Велес во знак на протест. За многу брзо време од добивањето на информацијата за незадоволството на лозарите и блокирањето на патот, пристигнува Министерот за земјоделие и бара лозарите да му ги кажат нивните барања. Ниту еден од присутните на блокадата не знаеше кои се нивните барања.
Аха, лозарите блокираат пат во знак на протест, но причината за протест и кои се нивните барања, остануваат непознати и за јавноста и за министерот.
По нашето инсистирање, рекоа да причекаме 11 минути да ги состават барањата. Ги чекаме тие 11 минути од вчера пладне, но ветените барања не ни се доставени за да ви ги предочиме. Ок, ќе причекаме по 11 минути уште неколку дена. Секако е викенд, шо. Во меѓувреме, дојдоа од партискиот штаб на дпмне и нѐ обвинија дека ние од „Аха“ си играме со добрината и трпението на овие работливи луѓе и дека ги притискаме во многу краток рок да ни ги напишат тие барања. Краток рок ли е 11 минути да ги чекаш три дена?
– Членот на преговарачкиот тим за законот за ОЈО на ВМРО-ДПМНЕ, Панче Тошковски, обвинува за бруталност (им биле ставени лисици на рацете), при приведување на Боки 13 и Кичеец?
Аха, член на правниот тим од ДПМНЕ говори за бруталност при приведување?
Она што не го виде Панче, е тоа што Боки, освен лисици на рацете, беше пречекан и со букет цвеќе од полицајците. Цели 11 минути траеше припремата на раскошниот букет што на граничниот премин го приготвуваа ревносните полицајци. Единствената бруталност која се случи тој ден, беше таа што, кога полицијата пријде со букетот, инфлуенСерката Лила – придружничката на Боки, остана разочарана зашто мислеше дека букетот е наменет за неа. Правда за Лила!
За букетите и изненадувањата на специјалците со кои, во време на владеењето на дпмне, беа пречекани Кежо, Брат Љубе, Велија и други, екипата на „Аха“ спрема посебна епизода.
– Бујар Османи лично со автомобил одел по институции и гледал дали таблите се двојазични. Видеото од таквото рандеву со снимателот, решил да го сподели на социјалните мрежи
Екипата на „Аха“ реши да го прогласи Бујар, за почесен член на „Аха – Академија за сатира“. Бујар, човече, 11 минути се премалку за да се прераскаже твојата бескрајна досетливост. „Аха“ во знак на респект кон ова дело, реши да ги самоцензурира сите спремни асоцијации од типот – Бујар кај знамињата во Зајас; Бујар ги руши дивоградбите од Нефи кај Чинарот; Бујар во клинч со градоначалникот на Сарај, за платформите на Матка; Бујар со Мерко на раскурцувањето за Ауди-то… Исто така, решивме да дадеме свој придонес и да му ја платиме казната што Бујар ја доби од полицијата за разговарање на мобилен при управување со возило и преминување на две полни линии. Бујар, ми те волимо!
– Миле Јанакиески, за 4 крупни предмети имал распит во тогашното ЈО на Марко Зврлевски, а распитите за сите четири дела траеле вкупно (вистински) 11 минути – изјава на адвокатот Тортевски во 24 Анализа.
Аха, значи единаесет минутен распит е фарсата која сакаат да ни ја наместат како реприза овие од бившиот режим, а пак тие истите, веќе сега биле „зрели“ да предлагаат и одберат јавен обвинител? Екипата на „Аха“ за овој настан, остана без коментар.
Наредните 11 минути вчудоневиденост, ви ги оставаме вам.
Рубриката АХА! е простор за хумор и сатира. Секоја сличност со реалноста е намерна и не е претерана.
FRONTLINE.MK
Discussion about this post