Министерот за внатрешни работи, Наќе Чулев денеска оствари работна средба со амбасадорката на Кралството Велика Британија и Северна Ирска, Рејчел Галовеј. Во фокус на работниот состанок беа вонредните парламентарни избори кои се спроведоа во државата, како и активностите кои треба да се преземат по нивното завршување.
На средбата Чулев изразил голема благодарност до амбасадорката Галовеј за исклучителната соработка за време на неговиот мандат во извршување на функцијата – министер за внатрешни работи.
Двете страни заеднички се согласија дека во иднина во Министерството за внатрешни работи е потребно продолжување на реформските процеси, како важен сегмент во евроинтегративниот процес на државата.
Денеска Чулев остварил проштална средба и со Амбасадорот на Република Словенија Н.Е. Милан Јазбец.
„На средбата уште еднаш се заблагодарив за донациите и поддршката од Република Словенија во борбата против коронавирусот, како и за поддршката на словенечките полицајци во учеството во заедничките операции на нашата јужна граница. Република Словенија е и останува наш искрен партнер и пријател.“, истакна на Фејсбук Чулев.
