Министерот за надворешни работи на Република Северна Македонија, Бујар Османи денеска имаше работна средба со Резидентниот координатор на ОН во Република Северна Македонија, Росана Дуџиак, соопшти Министерството за надворешни работи.
–Имавме одлична соработка со агенциите на Обединетите нации за време на мојот мандат во Секретаријатот за европски прашања и како Национален координатор на странската помош, особено изразена за време на првиот бран од кризата предизвикана од КОВИД19. Дозволете да ја пренесам благодарноста на целата Влада за севкупната поддршка, секако и мојата лична благодарност за посветеноста на вас и вашата администрација во асистирањето на земјата при справувањето со пандемијата, истакна Османи, посочувајќи дека очекува задржување на соработката и во претстојниот мандат како Министер за надворешни работи.
Османи, како што информира Министерството за надворешни работи, ја реафирмираше посветеноста на Република Северна Македонија за имплементација на целите на одржливиот развој на ОН, преку развојот на демократијата, човековите права, доброто владеење и одржливиот развој во земјата, како целосно компатибилни и со целите на европската интеграција што е важен стратешки приоритет на Република Северна Македонија.
–Република Северна Македонија активно се менува, и видливо, се менува кон подобро. ООН и нејзините агенции, како и досега, така и во иднина можат многу да придонесат за поддршка и успешно водење на овие процеси, истакна Османи.
