Чесно е Христијан Мицкоски конечно да свика вонреден Конгрес на кои ќе ги погледне во очи луѓето кои пред три години му ја дадоа довербата да стане претседател на ВМРО-ДПМНЕ и да даде отчет за сработеното, вели поранешниот градоначалник на Општина Аеродром, Ивица Коневски во денешното гостување во емисијата „Стадион“ на радио „Канал77“.
Тој е дел од Иницијативниот одбор за свикување вонреден Конрес во ВМРО-ДПМНЕ.
Коневски посочи дека Иницијативниот одбор има единствена цел, а тоа е да ги натера Мицкоски и актуелното раководство на ВМРО-ДПМНЕ да се соочат со делегатите на партијата, кои сепак ќе го имаат крајниот збор за тоа кој ќе застане на чело на најголемата опозициска партија во земјава.
„После сите премрежија изминатите три години низ кои помина новото раководство, оние порази кои ги доживеа и на локални и на претседателски избори и порази на последните парламентарни избори, мислам дека членовите кои го бираа претседателот Мицкоски заслужија тој да даде отчет пред нив, затоа што сепак мислам дека тие се најзаслужни за тоа што тој е претседател на партијата и согласно статутот Конгресот е највисок орган на партијата. Тој треба да даде образложение за сите оние изборни резултати кои што ги имавме во овие изборни циклуси“, изјави Коневски.
Тој нема кредибилитет ниту кај неопределените граѓани, ниту кај членовите на партијата, рече Коневски.
„Тоа може да се види по сите анкети. Ако партијата има одреден рејтинг, тој има 3 до 4 пати понизок рејтинг од самата партија, а дупло понизок рејтинг од Зоран Заев. Не може таков човек да ја предводи опозицијата и да ја победи оваа власт“, заклучи Коневски.
