Премиерот Заев смета дека сега не е време за избори бидејќи државата се наоѓа на средина од циклус кој треба да донесе серија придобивки за граѓаните и подобар живот. Тој во интервју за магазинот Детектор, барањата на опозицијата за ново соочување со граѓаните ги квалификуваше како јалови и неаргументирани додавајќи дека нивната единствена цел е да го спречат напредокот.
„Не се потребни предвремени избори без разлика на јаловите, безаргументирани барања на опозицијата, според мене, да се потрудат да го спречат тоа што веќе се случува и ќе се заокружи во случувањата, а тоа е да се стави ред во правната држава, економијата да ги даде своите резултати, конечно нашата земја да истера еден цел мандат, да заокружи политики, да исполни ветувања политиката спрема граѓаните, да се направи убав пресек, па после тоа да се оди на избори. Навистина како политичка партија и политичка гарнитура донесовме сериозни храбри одлуки, искрено верувајќи дека тие одлуки на крајот на денот значат економски стандард, значат нормална земја. Веруваме дека после политичките големи одлуки се случуваат интеграциите кои што носат економија, кои што носат доверба на институциите, стабилизација на државата од секој можен аспект и на крајот благодет и економски стандард за граѓаните“ – вели премиерот во интервјуто за Детектор.
Според него, изборите треба да се организираат на крајот од октомври идната година кога ќе бидат заокружени интегративните процеси кои пак Заев очекува да донесат подобар економски стандард и подобар живот за граѓаните. Тоа, според шефот на Владата ќе донесе многу позитивни резултати за неговата партија, а граѓаните ќе знаат да ги препознаат како што вели, храбрите одлуки на неговата политичка гарнитура.
Извор: Прес 24
