Министерот Едмонд Адеми, во својство на претседател на Националната комисија за УНЕСКО, заедно со градоначалникот на Охрид, Константин Георгиевски во Париз имаа работни средби со претставници на УНЕСКО за прогресот во зачувување на природното и културното наследство во Охридскиот регион.
Како што соопшти владиниот Сектор за односи со јавноста, на вчерашните средби со директорката на Центарот за културно наследство, Метчилд Рослер и со неколку амбасадори на земји-членки на Комитетот за светско наследство, бил презентиран и поздравен напредокот остварен по одлуката во Баку во јули.
– Во август, во координација помеѓу централната и локалната власт, во Охрид и Струга беа донесени одлуки за мораториум на градба и легализација на бесправно изградени објекти. Планот за управување со наследството е финализиран. Истиот наскоро ќе биде отворен за јавна дебата, а ќе биде испратен на увид и до УНЕСКО. Дека Владата е целосно посветена на исполнување на препораките, говори и фактот што Владата во ребалансот на буџетот одвои 50 милиони за санација на колекторскиот систем, со план за дополнителни средства за 2020, се наведува во соопштението.
На средбите било посочено дека во делот на соработката со Албанија, како една од препораките, неодамна на средбите во Тирана беше дефинирано и формирање на заедничка комисија за управување со Охридскиот регион.
– До испораката на прогрес извештајот во февруари 2020, УНЕСКО очекува значаен прогрес во исполнување на препораките. Северна Македонија останува посветена за зачувување на статусот на Светско наследство за Охридскиот регион, и подобрување на квалитетот на живот и економскиот раст за жителите на регионот, како и за сите граѓани на нашата земја, се додава во соопштението.
Извор: МИА
Discussion about this post