Како одговор на пукањето во демонстрантот од страна на полицијата во Хонгконг за време на протестите при одбележувањето на националниот ден на Кина, при што демонстрантот се наоѓа во критична состојба во болница, директорот на Амнести Интернешнл Хонгконг Ман-Кеи Там изјави:
„Пукањето во демонстрант означува алармантен развој во реакцијата на полицијата на Хонгконг. Властите на Хонгконг мора да започнат брза и ефикасна истрага за настаните кои предизвикаа тинејџер да се бори за сопствениот живот во болница. Полицијата може да користи смртоносна сила како одговор само при непосредна закана од смрт или сериозна повреда и само како последна опција“.
„Ги повикуваме властите на Хонгконг итно да го преиспитаат нивниот пристап во контролирањето на протестите со цел да се деескалира ситуацијата и да се спречи повеќе животи да бидат изложени на ризик“.
Амнести Интернешнл анализираше видео записи од пукањето и го идентификуваше плоштадот Хау Теи во областа Цуен Ван во Хонгконг за местото на настанот. Во кратка видео изјава, полициските сили на Хонгконг го бранеле пукањето со образложение дека полицискиот службеник сметал дека неговиот живот бил загрозен.
„Бидејќи полициски службени сметал дека неговиот живот е под сериозна закана, тој истрела кон напаѓачот за да си го спаси сопствениот живот и животот на неговите колеги“.
Амнести Интернешнл повеќепати повикуваше на независна и ефикасна истрага за полициската употреба на сила во текот на изминатите неколку месеци на протестите против законот за екстрадиција, вклучувајќи ја наводната тортура и други несоодветни постапувања во притвор. Неуспехот да се обрати внимание на претходната прекумерна употреба на сила придонесе кон сегашната состојба на ескалација на насилството.
Според насоките на ОН, огнено оружје може да се користи само за заштита при непосредна закана по животот или сериозна повреда.
извор: ЦИВИЛ Медиа
