Ирачките безбедносни сили застрелаа најмалку 28 демонстранти денеска, откако протестите прераснаа во немири, пренесе МИА.
Во градот Насирија, загинаа најмалку 24 лица, кога безбедносните сили отворија оган кон протестирачите кои го блокираа мостот во тој град. Медицински извори соопштуваат дека десетици лица се повредени.
Четворица демонстранти се убиени во Багдад, каде безбедносните сили отворија оган со гумени куршуми, но и со боева муниција против демонстрантите собрани близу мост на реката Тигар.
Ирачката војска соопшти дека формира воени „кризни единиците“, кои имаат задача да воспостават „безбедност и да го одржуваат редот“.
„По наредбата на врховниот командант на вооружените сили, премиерот Адел Абдел Махди, одредени воени команданти се назначени во овие единици за да ги насочуваат и контролираат сите безбедносни и воени сили и да им помагаат на гувернерите во нивната мисија“, се вели во соопштението од Војската.
Во меѓувреме, во градот Наџаф е воведен полициски час откако демонстрантите го запалија конзулатот на Иран.
Багдад и поголемиот дел од јужен Ирак, каде живее претежно шиитско население, од 1 октомври се зафатени од масовни протести. Демонстрантите ја обвинуваат Владата за корупција, незадоволни од лошите услуги на јавните служби и големата стапка на невработеност.
