Регистар на професионални онлајн медиуми изработија Здружението на новинари и Советот за етика во медиумите, во соработка со Стопанската комора на Македонија, кој во моментов содржи 67 портали.
„Ова е отворен процес, регистарот не завршува тука, со тоа што ако порталите го напуштат принципите на новинарството ќе бидат отстранети од регистарот, а дополнително други ќе влегуваат во него“, рече Катарина Синадиновска од СЕММ.
За да се биде дел од регистарот потребно е да се исполнат некои критериуми, така што од порталите се бара да имаат веродостоен импресум, да го почитуваат Кодексот на новинарите, Повелбата за етичко известување за избори и Статутот на СЕММ, да објавуваат информации од јавен карактер, да имаат регистрирано правно лице во земјава и транспарентна сопственост. Исто така, се бара да имаат транспарентно финансирање, да ги објавуваат одлуките на СЕММ за што ќе треба на својот портал да постават банер со кој се обврзуваат да ги почитуваат принципите на Кодексот на новинари.
Секако, како критериум се бара текстовите да се потпишат од автор или ако се преземаат од други медиуми да биде наведен изворот.
Како дополнителни препораки, Марина Тунева извршна директорка на СЕММ рече дека членките треба да имаат објавено ценовници за рекламирање или линк до објавен ценовник во маркетинг агенција, да имаат МК домеин, платената комерцијална содржина да е видливо означена.
„Пожелно е професионалните редакции да имаат најмалку еден уредник и најмалку двајца вработени, како и простории и технички услови за професионално извршување на работата“, рече Тунева.
Сите членки ќе бидат објавени на Промедиа.мк, кој од 1 јануари ќе биде активен, појасни претседателот на ЗНМ, Младен Чадиковски.
„Процесот на убедување зошто овој проект е добар ќе продолжи и понатаму. Ги одбравме бизнисмените со кои соработуваме затоа што тие се лост со кој се бориме за вистинити вести“, рече Чадиковски. Тој додаде дека ова е и шанса за политичарите да покажат дека навистина ја сакаат својата земја.
Ова е прв обид за саморегулација на онлајн медиумите, а според Синадиновска тоа е порака дека сами можеме да го доведеме новинарството на повисоко ниво, дека за тоа не нѝ е потребна Владата или која било друга организација.
„Ние како новинари сме подготвени сами да го исчистиме својот двор“, рече Синадиновска.
Изработувачите на регистарот велат дека со него полесно ќе препорачаат на бизнисмените со кои медиуми може да соработуваат, а да бидат сигурни дека тој медиум ги почитува начелата на новинарството. Ваква насока ќе добијат и политичарите во периодот пред политичката кампања за избори.
Велат дека се во преговори и со агрегаторите на вести, со кои ќе се потрудат да пласираат вести од релевантни медиуми.
Во моментов, регистарот содржи 67 портали со различна политичка и професионална ориентација, или како што беше речено, шареноликост на членките, а колку време постои некој медиум не е критериум.
За оние кои не ги исполнуваат стандардите нема место во регистарот, а Синадиновска потврди дека тие не се тело кое ќе може да казнува или изрекува санкции.
Фронтлајн е член во Регистарот на онлајн медиуми на СЕММ.
Б. Богдановска
