На Христијан Мицкоски, во годините додека е лидер на ВМРО ДПМНЕ, главна преокупација му е како да ги затвори предметите на СЈО и да ги спаси од затвор криминалците, инаку поранешни и актуелни партиски функционери.
Како поинаку да се протолкува деструктивната политика што ја промовира, наспроти шансата што ја има, да се издигне над партиските и личните интереси, да им одолее на диктатите од Будимпешта, и да излезе од криминалната матрица со цел да ѝ помогне на државата во евроинтегративниот процес.
Но, Мицкоски упорно ја пропушта шансата да ја трансформира партијата и да им помогне на судско – обвинителските институции да ги гонат престапниците на ВМРО-ДПМНЕ во објективна, независна и професионална постапка. Пример за тоа е игнорирањето на новиот закон за јавно обвинителство.
Едноставно, постапките на Мицкоски, и во однос на новите законски решенија, и во однос на историските договори што ги потпиша Македонија со Грција и со Бугарија, а кои гарантираат европска и сигурна перспектива, се антидржавни и одат директно на штета на граѓаните.
По сѐ поизвесниот пораз на изборите на 12-ти април, неизвесно е дали Мицкоски ќе ја задржи лидерската позиција во партијата. И предизборно, ВМРО-ДПМНЕ е поделена на фракции, а сѐ погласни се информациите дека голем дел од членството нема да гласа за партијата, револтирано од политиката што ја води.
По изборниот пораз, ќе се зголемуваат и конфронтациите во партијата, но ќе се појават и членови кои ќе бараат одговорност за изборниот пораз. Многумина видни членови на партијата во поразот на Мицковски гледаат шанса да ја преземат партијата, или тоа што ќе остане од неа. Ова сознание ги подгрева стремежите на неколкумина вмровци кои тежнеат кон пораз на партијата на избори.
Ако Мицковски замине од челната позиција во ВМРО ДПМНЕ тогаш неговиот краток мандат во партијата навистина ќе биде инстант, односно мандат во кој само се обидувал да најде начин како да ги заштити своите криминалци, преку притисоци во судството, преку погрешни политики во парламентот, преку јавните настапи со дистрибуција на лажни вести… А имаше шанса целата стратегија да ја води поинаку, но тоа би подразбирало правда, чесност и одговорност, нешто што одамна не е карактеристика на опозицијата.
Кога дојде на функцијата во јавноста тоа се толкуваше дека е кадар кој верно ќе ја чува лидерската фотелја за Груевски до моментот кога тој ќе реши да се врати. Но, се случи бегството од правдата на Груевски и ова е период во кој Мицковски и понатаму не се откажува од привремената улога да му го чува лидерското место на својот ментор.
Па затоа полесно му е да слуша наредби од таму, отколку да започне да спроведува своја политика.
Мицковски и Груевски се одамна поврзани, уште кога првиот земаше високи хонорари како советник на вториот.
Мицковски дојде на лидерското место со директна помош на Груевски, а тоа кога тогаш Никола од Будимпешта ќе си го наплати.
Преземањето е слободно и добредојдено.
