пишува: ЈАНЕ ЃОРЃИОСКИ
Мизрахи и нејзината епизода со „таблата“, некако само бегло се провлече во јавноста.
Мизрахи од позиција на техничка министерка ја сменила таблата (параванот) со комплетното уставно име и ја поставила старата табла.
Не навлегувајќи во навидум замаглената вмровска реторика која излегував од Мицкоски химселф, сега од министрите и замениците во техничката влада и секогаш од врхушката на ДПМНЕ олицетворена во Милошоски, Илче Димоски, Влатче Ѓорчев, и оној со црвените обравчиња заборавам му името нека ми прости, кога се работи за Преспанскиот договор, вакви провокации како оваа со таблата од Мизрахи, па била и само техничка министерка во преодната влада, ич не е бенингно како што навидум изгледа.
Она што не е „навидум“, туку апла очигледно и боде очи, е тоа што Мицкоски и сега неговата замаглена реторика околу Преспанскиот договор, во првиот момент на добивање каква и да е позиција на власт, тогаш реториката ќе ја потврдат во дело. Мицкоски, драги мои, ќе бара табли, паравани и слични методи за да го минира Преспанскиот договор на секој можен начин. Минирањето на Преспанскиот договор значи „бетон“ на нашите шанси за пристапување во ЕУ, а армираната вмронштина на Мицкоски го знае тоа и не отстапува ни за милиметар од флеката која гордо си ја носи – од неговиот газда бегалецот од Будимпешта.
Се сеќавате како почна Грујовата антиквизација?
Грујо тогаш го искористи ветото од Грција во Букурешт и нашето невлегувањето во НАТО, Мицко сега сака да го искористи француското вето за преговорите во ЕУ за да се дочепа до власт. Треба ли да се потсетиме дека со секој еден антички споменик, со секоја една промена на име на улица, автопат, или објекти, Грујо и неговата погубна политика од ден на ден не оддалечуваше со километри и години сè подалеку од ЕУ и НАТО? Тогаш почна со промена на името на автопатот, па следеше провокацијата со промена на името на аеродромот, па тек после почна онаа агресивна и лудачка антиквизаторско-мафијашка нуклеарка „Скопје 2014“, со која ем нè обезличија, ем не одалечија од ЕУ, ем нè испокрадоа. А сега, сега почнува со таблата позади Мизрахи. Цели 11 години режим и арамилак нè кошташе тоа тогаш наше бегло посматрање на навидум неопасните провокации.
Таблата позади Мизрахи всушност е онаа порака која Мицкоски секојдневно во неговата замаглена реторика ни ја испраќа, а ние упорно се правиме како да не ја гледаме. Таблата од Мизрахи е начинот кој ни кажуваат како ќе владеат и кон кој правец ќе ја насочат нивната деструктивна енергија. Со вакви табли и слични провокации, ако им дадеме шанса, Мицковци ќе го поткопуваат Преспанскиот договор сè додека не го потонат.
И ништо не е случајно, туку добро пресметано. Оние сили кои не и сакаат добро на оваа држава и кои поткопувајќи го Преспанскиот договор ни ја закопуваат секоја шанса за просперитет, добро го пресметале тоа и нема да застанат. Ене, чист пример е бојкотирањето на Законот за ЈО и измислување на купишта празни процедурални и забелешки за донесување на истиот.
Ако ова не ни е јасно, ако не гледаме дека на оваа „Мизрахи табла“ оваа проста 2+2 Мицкова математика ни добива резултат 5, тогаш со здравје да си ги носиме вмронците.
Но, Мицковци се прелагале во пресметката.
Од ПР вмронската кујна пресметале дека каква и да е реакција на критичката јавност или спротивниот политички табор на овој навидум непромислен потег на Мизрахи, сега предизборно, како и да се заврти е повеќе во „нивна корист“. Пресметал ПР-от вмронски дека сè уште граѓаните се сензитивни на темата со промената на името и намерно пуштаат провокации, за да предизвикаат реакција.
Она што не пресметале вмронските пи-ари е дека македонската јавност веќе е добро созреана и дека такви евтини финти повеќе нема да им поминат.
Сите права се задржани. УСЛОВИ ЗА КОРИСТЕЊЕ.
