Најмалку 50 жртви е билансот од повеќекратниот вооружен напад во неколку села во северна Нигерија. Властите, во официјалното обраќање, додадоа и дека насилниците краделе добиток од локалното население, пренесува AFP.
Според изворите, во неделата рано изутрина, околу 100 вооружени разбојници влегле во селата Керава, Зарејава и Минда во областа Кадуна, пукајќи во верници кои излегувале од џамиите после утринските молитви, по што теророт го прошириле и на локалното население, палејќи и oпустошувајќи голем дел од живеалиштата.
„До сега се најдени 50 тела на настрадани, но бројката не е финална и се очекува истата да расте, со оглед на тоа дека на пат е и најавената помош за спасување“ изјави Зајад Ибрахим, легислатор во парламентот на Нигерија. Тој додаде дека неколку жртви кои се повредени во нападите се пренесени во најблиските болници.
Нападите, според изјавата на Дајабу Керава, се одговор на учеството на населението во неодамнешните операции на армијата против таканаречените „бандити“ во нивните скривалишта во шумите.
„Насилниците ги обвинуваат жителите од нападнатите села за давање информации на војската поврзани со скришните места на насилничката група“ вели Керава, додавајќи дека претходниот ден закопале 51 жртва од нападите.
Портпаролот на полицијата во Кадуна изјави дека надлежните органи ги истражуваат нападите.
Во последните години, насилството во Нигерија е во пораст заради бандите кои постојано напаѓаат села, киднапираат население и крадат добиток. Во недостаток на безбедносни сили во регионот, ваквите насилни групи ги напаѓаат населените места од околните шуми, каде што се кријат.
Силите за безбедност во февруари најавија операција за справување со вооружените банди во регионот.
Во серија напади минатиот месец беа убиени 21 лице, вклучувајќи и 16-члено семејство.
Властите во неколку области во северозападниот дел на Нигерија имале повеќе неуспешни обиди за склучување мир со насилниците и прекин на крвопролевањето.
А. Н. С
