Затвореникот од Истражниот затвор што починал денеска бил зависник од дрога и не покажувал знаци на КОВИД-19.
Како што рече директорот на Здравствениот дом – Скопје, Виктор Исјановски во вечерашното гостување на „Топ тема“, се работи за млад човек на кој му била ординирана и терапија поради нарко-зависноста, а смртта му е констатирана попладнево, околу 14:30 часот.
– Во разговор со лекарот на затворот од Шутка ми беше предочено дека лицето не покажувало никакви знаци на корона вирус. Во текот на денешниот ден, при последната проверка во 14 часот не се пожалил од ништо, дури бил и весел. Потоа заминал на попладневен одмор и од затворските служби било констатирано дека починал. Повикана е Итната медицинска помош која исто така констатирала смрт, а телото на починатиот е однесено во Институтот за судска медицина.
Од сиромашните податоци што ги имаме, се работи за зависник, претежно од кокаин. Бил виден од психијатар на крајот од февруари и му е ординирана терапија. Тоа се сите информации што засега ги имаме. Јас сметам дека не се работи за корона вирус, туку за нешто друго, истакна Исјановски.
Според директорот на Центарот за јавно здравје, Арбен Зибери, засега брис од починатиот затвореник не е земен.
– Не е постапено од екипите на Центарот за јавно здрваје, но сигурно ќе се земе брис при обдукција во Судска медицина, а ќе се однесе и на испитување во Институтот за јавно здравје, истакна Зибери.
Зибери напомена дека досега, од почетокот на панедмијата, скоро сите 3.000 брисеви во Скопје се земени од страна на Центарот за јавно здравје, вклучувајќи го и првиот случај на дијагностициран/починат во затворот Шутка.
Извор: МИА
