Градоначалникот на Куманово, Максим Димитриевски кој беше првиот политичар кај нас позитивен на Ковид-19, денес соопшти преку својот Фејсбук профил дека и вториот тест за корона вирус на кој подлежал е негативен.
Имено, заради посетата на Куманово и средбата со градоначалникот Димитриевски, неколку високи преставници од Владата беа во самоизолација.
Градоначалникот соопшти и дека по потребната самоизолација и вториот негативен тест за корона вирус, тој се враќа на работните обврски.
Димитриевски, исто така, се соочува и со пријава за непочитување на мерките, за што имаше и реакција од неговата матична партија СДСМ.
„Од 1995г. се водам по начелата на мојата партија за демократија, еднаквост, отчетност, одговорност… и во тој дух ја извршувам функцијата градоначалник на најголемата општина во државата и ќе продолжам така.
Длабоко сум разочаран од изјавата на портпаролот на СДСМ и ја сметам за избрзана и несреќна. Покрај политичка носиме и институционално – општествена одговорност кон граѓаните и јавноста кои не избираат по предлог на партиите.
– Дебатата ќе ја водиме внатре во партијата.
Сега е време за дејствување против епидемијата и помош на граѓаните.
Постапката ќе покаже дека нема основ за кривично дело и дополнително ќе ги потврди сомнежите. Институционалната хајка која се води против мене и членовите на штабот изминатите денови за мене до овoj момент е неразбирлива.
Не сакам ни да помислам дека некој во овие тешки моменти се поигрува со здравјето на моите сограѓани, води политика и креира црни сценарија за елиминација на неистомисленици.
До тогаш останувам посветен на борбата против епидемијата и моите секојдневни обврски за доброто на сите граѓани.
– Уште еднаш ја повикувам директорката на Државниот здравствен и санитарен инспекторат и Министерот за здравство да го достави извештајот на увид на мене, штабот и јавноста, сепак тоа не е таен документ.
– Сакам да ја информирам јавноста дека штотуку го добив резултатот од вториот контролен тест кој е негативен направен во Институтот за Јавно Здравје, од утре продолжувам посветено со моите работни обврски.
– Да живее Социјал Демократски Сојуз на МАКЕДОНИЈА, Куманово, Македонија и сите нејзини граѓани”, напиша Димитриевски на Фејсбук.
