Во Косово во изминатите 24 часа, според официјалниот извештај на Институтот за јавно здравство (ИШКПК), починале 13 лица кои претходно биле дијагностификувани со Ковид-19, со што вкупната бројка на жртви на пандемијата се искачи на 269, јави дописникот на МИА од Приштина.
Сите починати, според косовските здравствени власти, имале и други потешки здравствени тегоби и страдале од дијабетис, кардиоваскуларни и други хронични болести.
Во соопштението на ИШКПК се наведува и дека, од вчера извршените 477 тестирања (вкупно 38.342 од појавата на заразата), позитивни на новиот коронавирус резултирале 225 лица.
Вкупно, од почетокот на епидемијата, во земјата се регистрирани 9.274 заразени. Како излекувани се водат 5.190 лица, од кои вчера 201.
Официјалната бројка на активни носители на новиот вирус во Косово изнесува 3.815.
