Ви недостасуваше ли високата мода и плиткото размислување на Gossip Girl? Драмата на Кери Бредшо, неодлучноста околу љубовниците и долгото пешачење на штикли, ама во Париз? Запознајте ја Емили!
Класична американка насадена во главниот град на модата, пратена да ги американизира француските гледишта за социјални медиуми и да внесе малку миленијалски пристап меѓу бумери во модната индустрија кои одбиваат да прифатат дека некои работи „веќе не се прават така“.
Серијата засега има 10 епизоди, креатор е легендарниот Дарен Стар кој ја благослови телевизијата со „Сексот и градот“ (серијата, за филмовите сме во негирање дека воопшто се случија). Заради големата гледаност, Нетфликс веќе најави втора сезона, така што, ако ја изгледавте во еден ден (секако дека да), ќе си почекате за втора сезона.
Дури и да не ви е најсимпатична cheesy тематиката на серијата, мора да признаеме дека е освежување наспроти лавината од сај-фај проекти кои никнуваат на платформата која и те како (ќе) ја пензионира регуларната телевизија. Се преморивме некако и од оние дистописки содржини, посебно годинава која нѐ почасти со прилично апокалиптично сценарио.
Емили е лик креиран за секој/а да може да се пронајде во неа, ако не се пронаоѓате во нејзиниот карактер, тогаш пробајте да научите нешто од нејзе. Работи маркетинг, на почетокот на нејзиниот престој во Париз, од само 50 следачи на Инстаграм стекнува над 2000 благодарение на досетливите описи под објавите и секогаш инспиративните слики кои не се клише.
Во една од епизодите, Емили е поканета на инфлуенсерски собир за промовирање на некоја козметичка куќа и со радост оди, затоа што одамна го знае брендот, а гледа и како да извлече професионална соработка со нив. Очигледно е од типот на луѓе кои и покрај тоа што знаат да „маневрираат“ со социјални медиуми, не лета во облаци и целиот тој собир за неа е мал хорор од блицови и занес на разгракани инстаграмџии полни со себе само затоа што имаат гооолем број следачи на Инстаграм. Од сите присутни, таа го привлекува вниманието на сопственичката на козметичката компанија затоа што објави досетливо story, додека една прави шпага со селфи стик во рака, а друга дојде со кучето кое исто така е „инфлуенсер“.
Досетливоста на Емили се исплати уште на почетокот на сезоната кога објавата за нејзината конфузија за францускиот јазик ја ретвитнува Брижит Макрон.
Серијата има влијание од Сексот и градот, Gossip Girl, The Devil Wears Prada, малку од Friends и уште мал милион chick flicks кои мораме да признаеме дека знаат да бидат симпатични за одмарање мозок.
А. Н. С.
