Арбен Таравари, случајно или не, во телевизиско интервју изнесе детали од состанокот со лидерот на ВМРО ДПМНЕ, Христијан Мицкоски на кој овие партии зборуваа за можна коалиција. За да ја „купи“ довербата на Алијансата на Албанците со цел да ги придобие во својата коалиција, Мицкоски ветил дека во Законот за употреба на јазиците ќе прифати да се смени формулацијата која ги означува Албанците како етничка заедница со 20 отсто од населението, односно ќе се согласел да стои само Албанци. Ваквиот радикално сменет став на Мицкоски кон законот го соопшти токму Таравари.
Јавноста се уште нема заборавено како Мицкоски и ВМРО ДПМНЕ протестираа против Законот за употреба на јазиците. Тогаш, со цел да се додворат на македонското гласачко тело, водеа кампања против Зоран Заев и СДСМ за продавање на националните интереси. Секојдневно од партијата на Мицкоски зборуваа како некој ја уништува државата и македонската нација, како некој им излегува во пресрет на Албанците за да ги придобие на негова страна, како никој не мислел на иднината на државните интереси освен тој и ВМРО ДПМНЕ. Ама сега, после изјавата на Таравари, паднаа маските на Мицкоски. Пред гласачите патриоти Мицкоски зборува едно, ги велича македонските национални интереси, ама затоа пред политичарите Албанци, чија соработка сега му е неопходна, зборува друго, како ќе ги унапреди правата на албанската заедница и тоа озаконето, преку законот кој до вчера му беше антидржавен.
Таравари во обид да открие дека Мицкоски се сменил, а тоа да го прикаже во позитивен контекст, практично му зари нож во грб на Мицкоски. Му ја сруши цела кампања која тој ја водеше против Законот за употреба на јазиците, а со тоа ја менува и перцепцијата на неговие гласачи кон својот лидер.
Арбен Таравари ви истото интервју откри и дека Мицкоски јавно им се извинил за насилството со упадот во законодавниот дом на 27 април, 2017 година, кога парламентарното мнозинство се обидуваше да го изгласа Талат Џафери од ДУИ за претседател, а агресивната толпа со предизвикување немири се обиде тоа да го спречи.
Но, Таравари можеби прави несреќен избор на зборови, па го користи „јавно“, иако таквото извинување на Мицкоски ниту е јавно, ниту пак може да испрати некаква порака, за која зборува Таравари. Од таквото тивко извинување во тесен круг се потврдува само едно, дека ВМРО ДПМНЕ стои зад упадот во парламентот и крвавото насилство врз пратениците. Ако Мицкоски почувствувал потреба да му се извини на Села, кој за малку смртно ќе настрадеше од сериозните повреди, тогаш Мицкоски прво морал да си признае самиот на себе дека целото крваво сценарио е на наговата партија и на неговите партиски соработници.
Ако Мицкоски си го признал тоа, тогаш е редно да им се извини прво на сите граѓани и на сите повредени политичари, па извинувањето да има смисла и да биде јавно. Дури потоа Мицкоски може да им се извинува поединечно на сите политичари, по примерот на Села, па макар тоа и го направил тивко, на уво, како што му дошепнал на Села дека му се извинува. Со еден збор, извинувањето на Мицкоски не е јавно, туку е лично. Ама од таквото извинување нема корист ниту уништената демократија, ниту скрнавениот законодавен дом, ниту дупнатите глави на пратениците, најмалку граѓаните кои колективно беа во заложништвото на ВМРО ДПМНЕ.
Д. Е.
