„Интензивно работевме изминатиот период на проширување на капацитетите на клиниките и се обезбедени близу 200 кревети за пациенти со ковид. Последна клиника е клиниката за ОРЛ која нема пациенти сеуште, но има слободни места каде што можат да се сместат.
Практично е мобилизиран целокупниот кадар на сите одделенија за сите тимови. Ангажирани се и дел од приватните специјализанти кои покажаа волја да се вклучат во овој процес, дел од младите и лиценцирани лекари кои и дефинитивно ќе бидат вработени во здравствениот систем.
Паралелно на сето тоа системот „Мој термин„ освен во некои клиники каде што е редуциран, работи нормално.
Во однос на матичните лекари, во однос на третман на пациентите, функционира истиот систем кој функционира со години наназад во однос дека прва инстанца е матичниот доктор, кој прв ја проценува состојбата на болните, па препишува терапија, а доколку има потреба пациентите се праќаат во болниците.
Има слободни кревети, доволна количина заштитна опрема, денес започнува постапка за набавка на дополнителни брзи тестови.
Во изминатите две недели целиот систем е мобилизиран со цел да се обезбеди хоспитализација на пациентите.
Во оваа состојба , вирусот сигурно ќе опстане и тој е ризик за сите нас, мерките мора да се почитуваат, очигледно е дека истите даваат резултат. Немаме во моментот огромен раст на број на заболени во нагорна линија и притисок врз здравствените работници и капацитети. Постои сеуште, но не со тој интензитет.
Позитивни се вестите кои доаѓаат во однос на вакцините, веќе има вакцини кои се во завршни фази. Сепак одлична вест е тоа што следната година ова ќе ја смени целата слика за пандемијата и со тоа веќе очекуваме и стабилизација„ истакна Филипче на денешната прес конференција.