Не стивнуваат реакциите од научно-наставната фела после заклучоците донесени од Наставно-научниот совет на Филозофскиот факултет во Скопје, а во врска со Нацрт верзија на Концепцијата за основно образование, претставена од Министерството за образование.
Елена Џукеска од Институтот за класични студии на Филозовскиот факултет, не се согласува со донесените заклучоци и затоа гласала против.
Таа во објава на Фејсбук, коментира за небулозите од заклучоците изнесени од Советот во кои се истакнува дека Имплементацијата на новата концепција за реформи во основното образование ќе донесе сериозни проблеми.
– Да. Навистина е така, вели Елена Џукеска.
„Некои кралеви и кралици ќе останат без круни. Некои хоштаплери и образовни профитери ќе останат без своите редовни приходи. Ќе стане јасно дека некои факултети наместо да бидат генератори на знаење се расадници на предрасуди и митолошко мислење типично за човечкиот род додека живеел во пештери. Ќе стане јасно дека реформата за основно мора да почне од високото.“, коментира Џукеска
Таа потенцира дека освен со заклучоците, не се согласува и со начинот на кој тие биле донесени и формулирани.
„Не се согласувам со заклучоците на Филозофскиот факултет, а уште помалку со начинот на кој беа донесени, формулирани по завршување на седницата на Наставно-научниот совет (ННС), бесцелно доставени на увид на институтите (откако завршило гласањето на ННС) и разгледувани на седница на деканатската управа (како да може деканатската управа да расправа post festum за нешто што веќе е усвоено на ННС) и затоа гласав против.“
Наставно-научниот совет на Филозофскиот факултет во Скопје, на својата VI вонредна седница смета дека Нацрт верзија на Концепцијата за основно образование, претставена од Министерството за образование има методолошки и дидактички недоследности и решенија кои не соодветствуваат на воспитно-образовната и општествената реалност во државата, со што имплементацијата на Концепцијата може да предизвика сериозни проблеми во сферата на образованието.
Ј. Ѓ.
