Основното јавно обвинителство во Битола отвора предмет за случајот од први јануари годинава што вчера беше обелоденет во јавноста дека минатиот месец лекарка, српска државјанка, извршила породување со царски рез иако не била вработена во оваа болница.
Предметот е отворен по анонимна пријава на 12 јануари 2021 година.
Кон предметот е додадена и кривична пријава поднесена која вчера ја поднесе СВР Битола против три лица кои ги пречекориле своите посебни овластувања во вршење на должноста и овозможиле лице без соодветна лиценца за работа издадена од Лекарска комора, да помогне при породување со царски рез.
Но, случајот не завршил со операцијата, туку потоа, едно од лицата, во оперативниот дневник внело невистинит податок, односно во графата податоци за оператор, ги внело своите податоци и податоците на колегата, а од стариот оперативен дневник отстранило страници каде што стоело името на третото лице за извршените оперативни интервенции на 1 јануари годинава.
Министерот Венко Филипче, одговарајќи на новинарско прашање, рече дека денеска во битолската болница има инспекција од ДСЗИ и одби да даде коментар пред да ги добие наодите од инспекцијата.
Вчера МВР соопшти дека докторка од Белград, Србија, која нема соодветна лиценца за работа од Лекарската комора во земјава, правела царски рез во Клиничката болница во Битола.
Докторката е сопруга на 33-годишен гинеколог во битолската болница, кој заедно со уште лекар заработија кривични пријави.
Двајцата гинеколози од Битола се пријавени за делото злоупотреба на службената положба и овластување, додека сопругот на докторката од Србија е осомничени за фалсификување службена исправа.
Српската лекарка, пак, е пријавена за надрилекарство и за непостапување според здравствените прописи за време на епидемија.
Извор: 360 степени
