Примариус доктор инфектолог Добринка Наунова Јовановска и главната сестра на Инфективна клиника Габриела Темелковска, се првите здравствени работници кои вчера ја примија вакцината против Ковид-19.
„Се чувствувам одлично. Самото аплицирање на вакцината е безболно и можам да препорачам сите да ја примат вакцината, затоа што ова е единствен начин да се заштитиме од оваа инфекција со која цел свет се бори.“, истакна првата вакцинирана примариус доктор инфектолог Добринка Наунова Јовановска, на прес-конференцијата одма после вакцинирањето.
– Засега планот е вакцинацијата да се одвива во Скопје, во Модуларната болница, а вработените во ковид-центрите од другите болници во текот на викендот и почетокот на следната недела ќе доаѓаат тука, а понатаму вакцините ќе се дисперзираат низ целата држава, рече министерот за здравство Филипче.
Филипче нагласи дека вакцините се безбедни и развиени на сигурни платформи.
„Вакцините се безбедни и развиени на сигурни платформи. Штитат 100 отсто, буквално сите вакцини кои се сега на пазарот, штитат од смрт и од тешка форма на болеста. Тоа е единствениот начин да се смени сликата за пандемијата во светот, потенцираше Филипче.
Имунизацијата од Модуларната болница се врши со 4.680 од предвидените 8.000 дози вакцини од производителот „Фајзер“ кои државава го доби како донација од Србија. Со пристигнувањето на другите дози вакцини во државата, ќе се врши дистрибуција на вакцини низ останатите здравствени домови во земјава каде вакцинацијата ќе се спроведува во постоечките вакцинални пунктови.
Пунктот во модуларната болница, каде има шест вакцинални позиции работи во две смени од 8 до 20 часот, а вакцинацијата ја спроведуваат медицински тимови од Здравствениот дом Скопје.
„Здравствените работници што сега се пријавија испратија добар сигнал. 70% од целокупниот број на здравствени работници кажаа дека сакаат да се вакцинираат. Досега се пријавени околу 4.000 здравствени работници за вакцинација, од кои околу 2.000 се во Скопје, а другите се во останатите градови. На секој здравствен работник кој примил вакцина веднаш му се резервира втора доза за ревакцинација.“, рече Филипче.
Министерот нагласи дека до крајот на месецов се очекуваат и 200 илјади вакцини од кинеската компанија „Синофарм“. Во земјава треба да пристигнат и дополнителни дози од „Фајзер“ кои се обезбедени од директните преговори со компанијата, како и дози преку Ковакс системот.
Филипче додаде дека сè уште е рано за целосно да се опуштиме заради тоа што сепак тука е детектирана британската варијација, мутација на коронавирусот.
До вчера до 14 часот вкупно 53.070 граѓани беа пријавени за вакцинирање против Ковид-19 преку веб-страницата „vakcinacija.mk“, а преку матичните лекари 24.958 лица.
Ј. Ѓ.
