Консултациите со компании, стопанските комори и локалните самоуправи кои ги организира Министерството за образование и наука во рамки на кампањата „Учи паметно, работи стручно“ денеска продолжија во Скопје, со цел да се утврди потребата од отворање нови профили и паралелки во средните стручни училишта низ државата од идната учебна година и низ дијалог со реалниот сектор и според барањата на пазарот на трудот да се дизајнираат наставните програми и уписните политики.
Кампањата за промовирање на предностите на средното стручно образование низ општините МОН ја почна овој месец. Министерката Мила Царовска изјави дека дискусиите се при крај и ќе завршат до 1 март. Посетени се речиси сите градови, остануваат уште три општини каде што во наредните денови ќе бидат организирани консултативни средби.
-Потоа се сумираат сите заклучоци од средбите, се комуницира со оппштините и градоначалниците, училиштата и стопанските комори и понатаму конечно ќе се објават во огласите. Очекувам да произлезат што поголем број дуални паралелки. Секој чекор напред во средното стручно образование дава поттик на економијата и на државата. Затоа е многу значајно да имаме стручен кадар бидејќи недостигот од него е многу голем во нашата држава, рече Царовска.
Посочи дека преку дуалното образование учениците ќе се оспособат со вештини со кои бргу ќе се вработат, а компаниите ќе го најадат кадарот што сега е дефицитарен. Соопшти дека според истражувањето кое опфатило 400 компании, 85 отсто се подготвени да ги вклучат учениците или во дуално образование или во феријална пракса.
Градоначалникот на Скопје Петре Шилегов во однос на реформите во стручното образование соопшти дека главниот град има 23 средни училишта, а 15 од нив продуцираат стручен кадар.
-Во овој процес ги вклучуваме и компаниите, за децата преку дуалното образование да бидат доволно стручни и доволно способни, а да бидат продуцирани согласно со барањата на пазарот на трудот и компаниите кои имаат дефицит од кадар. Целта е учениците утре да бидат и стручни, но и конкурентни на пазарот и добро платени, рече Шилегов.
Проектот „Учи паметно, работи стручно“ се спроведува со поддршка на Амбасадата на Швајцарија. Амбасадорката Сибил Зутер Техада истакна дека целта е да се приближи приватниот сектор до образованието.
– Швајцарија е пример за дуално образование, што ја прави нашата економија многу конкурентна. Во серијата настани што ги одржувавме, пред се, секаваме да ги слушнеме потребите на приватниот сектор, да каже кои се пречките, да отвориме дијалог со МОН и со стручните училишта. Дијалогот е клучен за овој проект да биде успешен, нагласи амбасадорката на Швајцарија./МИА/
