Собранието вчера попладне и изгласа доверба на Владата, откако претходно тоа од пратениците усно го побара премиерот Зоран Заев. Опозицијата не присуствуваше на седницата за време на гласањето, а доверба на Владата и дадоа 62 пратеници.
Изминатите неколку месеци јавноста е сведок дека Христијан Мицкоски постојано во настапите повторува дека власта е загрозена, дека за неколку дена ќе нема мнозинство, дека владината криза само што не испливала на површина, и се така во круг, а во реалноста тоа никако да се случи. Се потврдија и двете, Владата е стабилна, опозицијата во аут.
Иницијативниот одбор за свикување на вонреден конгрес на ВМРО-ДПМНЕ бара уште сега актуелниот претседател на ВМРО-ДПМНЕ Христијан Мицкоски да си поднесе оставка. Тие велат дека секој искрен и чесен член на ВМРО-ДПМНЕ вчера очекувал триумф и му верувал на Христијан Мицкоски за новото парламентарно мнозинство во Собранието.
Првата фаза од пописот засега се одвива без проблеми. Заклучно со вчерашниот ден преку апликацијата за самопопишување се евидентирани вкупно 18 236 граѓани.
ЦИВИЛ денеска во Штип ќе организира панел дискусија „Попис: Статистика, не политика“. Во согласност со мерките за заштита од Ковид-19, панел дискусијата ќе биде одржана без публика, но ќе биде пренесувана во живо на Фејсбук страницата на ЦИВИЛ.
Заев, придружуван од директорот на Дирекцијата за ТИРЗ, Јован Деспотовски се сретна со раководството на италијанската индустриска групација „Витило“, сопственикот и управител Антонио Витило и Чиријако Ло Конте, директор на „Витек Македонија“. Следува нова инвестиција од 10 милиони евра.
Шахпаска денеска се сретна со претставниците на Институтот за истражување и политики- Ромалитико. Министерството продолжува со поддршката на ромската заедница, преку активно вклучување на Ромите на пазарот на труд, предучилишното образование и обезбедување на лични документи, вели Шахпаска.
Платформата за родова еднаквост упатува барање и апел до работодавачите да ги ослободат работничките од обврски во понеделник на 8 март, од 14:00 до 17:00 часот, со цел да присуствуваат на овогодинешниот марш под наслов „Држава што не постапува е држава што силува“.
М. Миткоска
