Во организација на библиотеката „Искра“, а со поддршка од Министерството за култура и од локалната самоуправа, под мотото „Другарувањето со книгите ни е песна“, во Кочани по десетти пат се реализира Фестивалот на децата, книгите и музиката.
Во рамки на четиридневната манифестација, денеска се одржа литературна средба на писателот Горјан Петрески со најмладата читателска публика од Кочани. На средбата присуствуваше и македонскиот пијанист со светско реноме Симон Трпчески, кој е главен лик во делото „Сама“ на Петрески.
-Преку литературната средба на тема „Љубовта кон зборот и музиката остава трајни вредности во културата“ сакаме да ги афирмираме трудољубивоста, доследноста и упорноста, како карактерни особини на истакнатиот македонски пијанист, кој е инспирација за стожерениот лик во романот на Петрески. Идејата е да придонесеме за правилен образовен, културен и социјален развој на децата и на младите, истакна Магдалена Кочовска-Салтирова, координаторка на проектот.
Пијанистот Трпчески пред младата читателска публика нагласи дека најголемата поддршка во животот се родителите и топлата семејна атмосфера во која детето може да израсне во стабилно човечкото суштество.
– Среќен сум што целото образование го комплетирав во Македонија, од неа тргнав и го освоив светот. Благодарен сум на иницијативата за оваа средба, за да им помогнеме на младите полесно да се пронајдат себеси. За тоа е потребно избистрување на желбата, истрајна работа и посветеност, како и постојано да се трудат да ги остварат сопствените цели, истакна Трпчески.
Писателот Горјан Петрески упати благодарност за можноста да учествува на манифестацијата во Кочани и притоа да биде во друштво со главниот лик во својот роман.
-Во Кочани секогаш ми е прекрасно, па дури и во ова пандемиско време. Да не беше вакво времето, којзнае каде по светот ќе беше Симон Трпчески, ама во секое лошо има и добро, а добро е што сега е овде со нас. Тој е генијалец кој стои на цврста подлога, а јас бев првиот што го откри, истакна Петрески.
Во програмата на Фестивалот е предвидено во наредните три дена да се одржат промоции на дела за деца од разни издавачки куќи, средби со илустратори и познати автори, а ќе бидат доделени и наградите од литературниот конкурс „Музиката на зборовите“.
Одбележувањето на Меѓународниот ден на литературата за деца се спроведува со почитување на протоколите за културни настани во период на здравствена криза, поради што бројот на учесниците е ограничен.
извор: МИА
