Главниот координативен кризен штаб го прифати предлогот на Комисијата за заразни болести и врз основа на епидемиолошките текови и состојби во државата, намалување на бројот на хоспитализирани лица и бројот на заразени лица, за утрешната седница на Владата се препорачуваат следните мерки за усвојување: Почнувајќи од 12 мај 2021 година, забраната и посебниот режим на движење на населението и возилата од јавен превоз да почнува од 24:00 часот до 05:00 часот.
Колективен имунитет до крајот на летото, очекува министерот за здравство Венко Филипче. Тој, како што изјави во вчерашното интервју на Радио Слободна Европа, очекува со сите вакцини што треба да пристигнат во земјава, до крајот на летото да се постигне колективен имунитет. Министерот нагласи дека сите вакцини се безбедни и нема потреба граѓаните да преферираат една наспроти друга вакцина.
Претседателот на Владата на Република Северна Македонија Зоран Заев, во Брисел се сретна со Вархеји. Ние сме подготвени за разговори, веруваме дека треба да имаме уште еден обид во периодот што доаѓа, но треба да знаат и колегите во Бугарија и сите во Европска Унија дека за нашиот идентитет нема ниту да разговараме, ниту да преговараме и дека сите обиди тој да се става на преговарачка маса ќе бидат одбиени од македонска страна, потенцираше на средбата претседателот на Владата на Северна Македонија Зоран Заев.
ЕУ е свесна за своите грешки, но да ја имавме оваа политика во 2008 година најверојатно веќе ќе бевме дел од ЕУ. Изјавите на Вархеји за одвојување немаат логика, знаеме во минатото, во 2019 кога Франција ја побара новата методологија, дел од државите не сакаа нас да не одвојат од Албанија. Ставот на Вархеји е негов, ќе мора да се заземе став, не гледам расположение во ЕУ да се направи раздвојување на двете држави, изјави министерот за правда Бојан Маричиќ
Одделот за специјални полициски операции добива нова униформа, а станува збор за неколку различни униформи, информира денеска на Фејсбук, министерот за внатрешни работи Оливер Спасовски.
Кратка приказна за достоинството и интегритетот… Утрото на 9 Мај, Денот на Европа, во близина на Универзалната сала во Скопје, истовремено се одржаа два настани. Едниот на вицепремиерот за европски прашања, Никола Димитров и шефот на Делегацијата на ЕУ во Северна Македонија, амбасадорот Дејвид Гир, а другиот на руската амбасада. Руските баќушки, намерно или не, ја „рокнаа“ руската химна на својот разглас и го прекинаа Димитров додека говореше за раѓањето на Европската Унија. Вообичаено смирен, тој не се збуни, барем не премногу, па на англиски јазик само рече дека додека трае „ова“, ќе направи пауза. Елегантно, колку може да дозволи една таква приземна ситуација. Упадот на руската химна го нарече „ова“ (this), пишува ЏАБИР ДЕРАЛА.
Се говори дека значителна сума од два милиони евра годишно можат да бидат обезбедени од данокот од извозот на цветот од медицински канабис. Од оние 10 проценти екстра данок што оваа индустриска гранка ќе ги дава кон државата ќе се подржат лекувањата на лицата со ретки болести, како и проекти од културата, спортот и граѓанскиот сектор – открива Љубиша Николовски во „Слободен печат“.
М. Миткоска
